Kiralongrar tajung mesüra tamajung ta mali: Pranab

Jaipur, February 03 (Agencies): Kiralongrartem pusemba mesüra senotsü agi yariba linüktem anema alimai pei linük mapatong ka ama inyaktsüla, ta tanü Tir, Pranab Mukherjee-i ashi.

Kiralongraba anemba conference ka lapoktsüdang Mukherjee-i, “Kiralongrar tajung mesüra tamajung ta mali. Iba ya temenen mapa,” ta ashi.

Iba senden nung India national security nungi shisashirtem aser practitioners longjemer kiralongraba anemba mapatong onüktem nung jembitsü.

Tir Mukherjee-i, “Yimtenren aser mitkar mapatongtem ajanga dangbo kiralongraba anema rara nung tamakok angutsü. Loktiliba aser tamangba yimsü tsütsülen nungia mera agitsü nüngdak,” ta ashi.

Paisa, India ama lokti balala jenti aliba linük ka nung telemsa adokbaji majung, ibaji ajanga tetoktepba rara adoktsü, ta ashi.

Iba senden nung Rajasthan Chief minister Vasundhara Raje-ia, asen arrtsülen nungi amokmerentemji linüki meteta alitsüla, ta ashi.

Tawa Afghanistan chief executive Abdullah Abdullah-i tesem nung aliba linüktem dang kiralongraba anema raratsü atema peipei linük sasep nung mapatong benoktsüla, ta mepishiogo.

Pakistan linük tenüng metetshii Abdullah-i, Cold War tembangba sülen region nung tashi aliba linüktemi pei security nükjidong ataloktsü atema rara adokdaktsütsüsa inyaker, ta ashi.

Ajisüaka paisa, Afghanistan ya ano yimjung maparen tiyong ka nung lir aser Taliban telok den taruba ken oji February 6 nü Islamabad nung akatsü, ta ashi.

Afghanistan kidanger linüktemi kiralongrar tajung aser kiralongrar tamajung ta mebendangtsüla ta shia Afghan lenirisa, “Linük sasep nung kiralongrar anema mapatong benokba ya asenoki kechiba region longjemer meinyakteter (?) Heart of Asia, SCO aser SAARC ajanga iba tebilemtsü koktettsü,” ta ashi.

Taliban den yimjung ken o jembitsü sentong liaka Hombarnü Taliban teloki Kabul amakba sülen Afghan Tir, Ashraf Ghani-i, “Ozü senso, tetsürtem aser tanurtem tepsetertem den sorkari kodanga yimjung ken o mejembitsü,” ta shiogo.

You must be logged in to post a comment Login