Kiralongrartem anema mapa takok ngua inyakdar: Rajnath

Leh, October 03 (Agencies): Kashmir, Baramulla nung kiralongrartemi army aser Border Security Force (BSF) camp amaktsü merangba sülen Union Home Minister, Rajnath Singh-i, Pakistan nung amenoka aliba kiralongrartemi amakba atema tapet meyiptsüdar, ta metetdaktsü.
Yasüng kiralongrartemi BSF sepaitem amakdang sepai ka asü aser ka mejungi yiru.
Kiralongrartemi Jammu & Kashmir, Uri nung army camp ka amakdang sepai 19 tepsetba sülen yasüng 10:30 ako meta kiralongrartemi Srinagar nungi kilometer 50 shi pilar aliba Baramulla nung army aser CRPF camp amaktsü merang.
Kashmir onük nung bangzüng renemtsü atema nübur balala den jembishinütsü asoshi tang Home Minister-i Leh aser Kargil semdanga lir.
Hombarnü Leh nung osangbenertemi asüngdangba ka langzüdang Singh-i, “Yangi nüburtemi kechi timtemsa ajangshir, onoki itemji bentettsü merangtsü,” ta ashi.
July 8, 2016 nü security sepaitemi Hizbul Mujahideen commander, Burhan Wani kahsetba sülen Singh-i tang agi pezübenbuba Jammu & Kashmir semdangogo.
September 4-5 anogotem nunga Singh leniba nung party ajak nungi lenirtemi Srinagar aser Jammu semdanga liasü. Iba mapang nung parnoki lokti balala 50 nungi nisung 400 dak tema ajurua liasü.
August 24-25 aser July 23-24 anogotem nunga Home Minister-i state semdanga liasü.