Kiralongrartem atema mang mayimtsüla: Congress

Srinagar, July 09, 2016: Yashi Hokolbarnü Kashmir nung security sepaitemi Hizbul Mujahideen commander, Burhan Wani tepsetba sülen tanü Srinagar, Jammu & Kashmir nung Kashmiri nunger longkak aitertemi police dak long agi aonba noksa nung angur.

New Delhi, July 09 (Agencies): Kashmir nung Hizbul Mujahideen commander, Burhan Wani tepsetba ajanga Kashmir nung longkak aitba ya tia maka tatalokba ka lir ta shia tanü Congress Party-i, tai maketer nisung noklang aika tepseter telungpurtem tepsetba atema nüburtemi mang mayimtsüla, ta ashi.
Senior Congress lenir, Ghulam Nabi Azad-i, “Burham ya kiralongrar ka liasü. Pa  dak tai lir ta asüba nungji teratatsü mali aser pa ya kiralongrar ka liasü. Kiralongrartem asüdang Kashmir nüburtemi mangyimba ya tai maka,” ta ashi.
“Nisung noklang aika tepseter kiralongrartem asüba atema nüburtemi mang mayimtsüla,” ta Congress lenirisa ashi.
Yashi Srinagar nungi kilometer 81 shi pilar Kokernag tesem nung security sepaitemi arishi küm 21 Burham Wani den par züngsem ana kahset.
Iba tatalokba sülen Kashmir tesem aika nung longkak aita longkak aitertemi police posts aser security sepaitem den raraba den külemi Kulgam nung BJP office-a amak.
Tensa majungba ajanga ketdangsertemi tamang aini aortem ‘Amarnath yatra’  Jammu nungi Baltal aser Pahalgam base camp tashi nokdangogo.
Yashi Hizbul Mujahideen commander, Burhan Wani tepsetba sülen Honibarnü Jammu & Kashmir nung security sepaitem aser longkak aitertem tsüngda raradang tajemba agi nisung 8 tashi süogo.