Kiralongrartem azüoktsü: BJP

New Delhi, February 25 (Agencies): Taoba Jammu & Kashmir Chief Minister, Farooq Abdullah-i jembiba o aija tanü Bharatiya Janata Party lenir, Nalin Kohli-i, Kashmir nung lisopurtemi raraba oset amshiba azüoktsü, ta metetdaktsü.
“Kuli aika nung ajemdaker Farooq Abdullah-i jembiba otemji aitsütsü tetemsü. Pai Centre aser state naprongla nung inyakdangogo, aser linük Temzüng nunga tenangzükba agiogo. Pai jembiba oji kiralongraba metentsütsü merangba o lir,” ta paisa ashi.
“Prangpong agi tai maketer tepseter telungpurtem aser kiralongrartemji azüoktsü mesüra aputsü,” ta Kohli-i ashi.
Paisa, “Rara mesüra kiralongra atema metenja jembibaji meimchir anema lir, kechiyong raraba aser kiralongrabaji meimchir dak mapet,” ta ashi.
Srinagar nung party nung inyakertem den jembidang taoba CM, Farooq Abdullah-i, “Jammu & Kashmir onük latettsü atema lanurtemi pei taküm tenla agutsür,” ta ashi.
“Tanü asen lanurtemi taküm tenla agutsübaji, parnoki MLA tem, MP tem mesüra Minister tem akumtsü merangba agi masü. Parnok temeten atema takhangba agüja parnoki taküm tenla agutsür. Iba ya asen li lir aser kiburtemji asenok lir,” ta pai jembia liasü.
Ano Congress lenir aser taoba mapang Union Finance Minister, P. Chidambaram-i, Kashmir nung takhangba aguja ola adokertem anentsütsü atema sorkari tashiyim mapatong benoker, ta jembiba aija Kohli-i, “Parnok (Congress) kodang sorkar menden nung lidir parnok tangatetba balaka lir, aser kodang sorkar menden nung melidir tangatetba ano balaka melenshir. Linük atema kanga tongtibang, security onük ka nung parnoki yamaji jembibaji tim asü. Iba ama oji National party ka nungi imlar asü?” ta asüngdang.
Yashi Hyderabad nung sentong ka nung jembidang Chidambaram-i, Central sorkari tashiyim amshia Kashmir nüburtem ola nembangtsütsü merangba ajanga Kashmir tesamar dang liasü, ta jembia liasü.
Congress lenirisa, “India sorkari tashiyim tasa balala amshiba ajanga Kashmir nung nisung million teneti parnok sendoker ama bilemer, aser ibaji aibelen tulu ka lir,” ta jembia liasü.