Kiralongrartem tetsübu liaka Sri lanka team Pakistan-i aotsü

Colombo, Rongjui/September 19 (Agencies): Sri Lanka cricket board-i Brehostibarnü ashiba agi, kiraongrartemi Pakistan nung oa asayaba mapang asayartem amaktsü akok ta tetsübu liaka odang oa asayatsü.
Sri Lanka Cricket secretary Mohan de Silva-i ashiba agi, Mongolbarnü Pakistan-i aotsü atema defence ministry nungi temelaba nguogo.
“Sentong yanglua aliba ama Pakistan nung oa asayatsü aser defence ministry nungi temelaba nguogo. Ni aser ketdangpurtemi asayartem miner aotsü,” ta Silva-i AFP dang ashi.
Taoba hopta defence ministry dang tensa asadangtsü asoshi tetuyuba agüja liasü.
2009 küm March ita Pakistan kübok Lahore nung Test asayaba mapang Kiralongrartemi Sri Lanka team maka liasü aser iba lendong nung asayar trok yiru.
Iba lendong nungsa Pakistan nunger police trok aser civilian ana asü.
Iba tatalokba sülen international team timba kati Pakistan nung oa asayatsü asoshi memulunger.
Pakistan-i security tsütsü jenjang agiba asadangtsü asoshi De Silva-i taoba ita security consultant ka den Pakistan semdangogo.
Sri Lanka prime minister office nungi sangdong ka ajanga asayartem amaktsü akok ta osang agütsüba sülen asayamung koba September 27 nü tenzüktsü lir iba ya taoba hopta khen atema sota ata.
Pakistan Cricket Board (PCB)-i ashiba agi, Sri Lankan team tekümzükba dak sendakba nung osang agütsüba parnoki mejangjai liasü. Ajisüaka parnoki tekümzükba agütsütsü ta nangzükogo.
Sri Lanka team nungi asayar tejen 10-i iba asayamung nung shilem magitsü asoshi telemtetba agiogo.
Sri Lanka-i one-day internationals asem aser T20 asaya asem atema squad ana sangdongogo.
Asaya anogotem:
1st ODI — Karachi, September 27
2nd ODI — Karachi, September 29
3rd ODI — Karachi, October 2
1st T20 — Lahore, October 5
2nd T20 — Lahore, October 7
3rd T20 — Lahore, October 9