Kiralongrartemi Baghdad nung nisung 14 tepset

July 24, 2016 : Baghdad, Iraq nung Shi’ite Muslim amangertem kanga bulua aliba district Kadhimiya nung taküm bendanga agütsür lendong agütsür kati pei mang nung tapoktsü alenloker pokdaktsüba tesem nung yangji aliba nüburtem aser Iraq security force temi mita reprangba noksa nung angur.

Baghdad, Iraq July 24 (Agencies) : Deobarnü Baghdad anüdoklentip tsütsü taküm bendanga agütsür kati pei mang nung tapoktsü alenloker pokdaktsüba lendong nung tajemba agi nisung 14 pokset ta Iraq ketdangsertemi metetdaktsü.
Iba tapoktsü pokdaktsüsang ya tetsüng agi arur Shiite Muslim nunger kanga bulua aliba Kadhimiyah tesem nung nisung aika mazüngi pei nüngdak atema jaja alidak pa temang nung alenloka aliba tapoktsü tesashiji pokdaktsü, ta police ketdangser kati ashi. Iba lendong nung tajemba agi nisung 31 tashi yiru, ta pai shisem.
Ano Abu Ghraib, Baghdad nunga iba mesükba lendong ka nung public asem asü aser 11 yiru, ta police ketdangser tanga kati metetdaktsü.
Iba lendong nung asüba aser yirur aliba osang tejangja ya mozü ki ketdangser anati metetdaktsü.
Osang agütsürtemi parnok tenüng memetetdaktsü kechiba süra iba osang metetdaktsütsü parnok nem temelaba agüja mali.
Kadhimiyah nung lendong atalokbaji onok mapa lir, ta Islamic State (IS)-i online sangdong ka ajanga metetdaktsüogo. Iba tesem nung security aika aliba ngua parnok den Shiite züngsemtem samatsütsü mechi onoki iba lendong agütsü, ta kasa sangdong nung shia lir.
Associated Press-i iba sangdong ya shitak asü tiyazüar mejangjateter ajisüaka iba sangdong ya kiralongar tem website nung lir.
Iraq anülolen aser anüdoklentip tsütsü aliba tesemtem amanglema aliba telok, Islamic State (IS)-i ibala mesükba lendong ya timba ka Shiite telok aliba tesem nung agütsür.
Yaküm nungi IS teloki amanglema aliba tesem aika tanaben meyiba agidar. IS teloki tesüiba küm ana dak tema shi amanglema aliba Fallujah tesema Iraq force temi tan ang meyipa agiogo. Ajisüaka item telungpur yagi Baghdad aser temeküt tesemtem nung maneni tapoktsü tesashi poklokja lendong agütsür.
Iba osang ya Associated Press nung osang zülurtem Murtada Faraj aser Ali Abdul-Hassan nati agütsüba lir.