Kiralongrartemi Brussels yimti amakdang nisung 34 asü

Kiralongrartemi amakba sülen Belgium sepaitemi yirua alirtem anir aoba noksa nung angur.  Telung noksa nung Belgium sepaitemi taküm bendanga agüja bomb pokdaktsür ana noksa sayaba angur. 

Brussels/Delhi, March 22 (Agencies): Mongolbar anepdang kiralongrartemi bomb asem amshia Belgium linük yimtiba, Brussels amakdang tajemba agi nisung 34 süogo aser nisung 170 dak tema yiruogo, ta osangbenertemi metetdaktsü.
Tanep 7:00 ako (GMT) meta Brussels’ International airport nung bomb ana apok, iba sülen ghonda ka shi dang lir EU indang headquarters anasa Maelbeek city metro station nunga bomb ka apok.
Iba dak sentakba nung kiralongrar telok, Islamic State (IS)-i parnok den sendaktepa aliba Amaq agency ajanga sangdong ka nung iba mapa ya parnoki inyak ta tenüng agia sangdongogo.
France yimtiba, Paris amakba ken o nung jenshia senzür tongti, Salah Abdeslam Brussels yimti nung apuba sülen anogo pezü lir tanep iba lendong atalokogo.
Belgium linüki pezünü mangyimtsü sangdongogo.
Osangbenertem den jembidang Belgium Ato kilonser, Charles Michel-i, “Kiralongrartemi amaktsü ta onoki tsübua liasü, aser tang ibaji atalokogo,” ta ashi.
Paisa, “Tang tesütiba amakba ya tesashi aser tasümait mapa. Iba anogo ya lendong, tammang anogo ka lir. Nisung ajaki süngjema mangyimtsü ni ayongzüker,” ta ashi.
European Council Tir, Donald Tusk-ia, “Item amakba ajanga, ano maneni kiralongrartemi rara aser tesempa prokba sayur,” ta ashi.
United States Tir, Barack Obama-ia, bomb amshia amakba ya tai maketertem anema inyakba mapa ka lir, ta aitsüogo.
Brussels nung airport aser public transport ajak shibangogo, ajisüaka kobi melii train station karbo lapoktsü, ta ketdangsertemi metetdaktsü.
US counter terrorism ketdangser katibo, “ISIS nung adentsü atema Syria aser Iraq-i aoba sülen, parnokji linüki tanaben meyipa arutsü ta bilemba nung ajemdaker- Belgium nungerji mashii mapang ka nung apoktsü aliba bomb ka nung mena liasü,” ta ashi.
Tanü Brussels amakba sülen IS pusemertembo social media nung kanga benjungtepogo, item rongnung twitter post ka nungbo, “Tarutsü nung tamajungba ataloktsü,” ta shia liasü.
India nunga Jet Airways tayimtsü 5 nung tekümdangtsü sangdong
Ano tanga osang ka nung, kiralongrartemi Brussels airport amakba sülen tanü India nunga Jet Airways tayimtsü pongu nung tekümdangtsü osang sangdonga liasü.
Jet Airways call Centre ka dangi mejangjaba nisung ka nungi osang aruba nung ajemdaker Delhi nung aliba Jet Airways office-i tayimtsü pongu nung bomb lir, ta metetdaktsü.
Tayimtsü ponguji Delhi-Chennai, Delhi-Chandigarh, Delhi-Dehradun, Delhi-Gorakhpur aser Delhi Chennai tayimtsütem liasü. Item rongnung tayimtsü pezü junga anenogo.
Delhi-Dehradun tayimtsüji tezülen yur bomb squad ketdangsertem atadar.
Tanü Brussels nung aliba airport nung Jet Airways cabin crew anabo yirua alirtem rongnung dena lir.
Belgium nung iba lendong atalokaka Ato kilonser, Narendra Modi-i sentong yanglua aliba ama March 30, 2016 nü Brussels semdangtsü, ta External affairs ministry-i metetdaktsüogo.
13buba India-European Union Summit nung adentsü atema tan March 30 nü Modi-i Brussels semdangtsü sentong lir.
Belgium nung iba tatalokba aija Modi-ia twitter ajanga, “Brussels nungi aruba osang ya taoksatsüka. Amakbaji aitsütsü tim. Asür kibongtem den asüko osang lemsar. Yirua alirtem tekaraba nung aneptsü sarasademtsür,” ta ashi.