Kiralongrartemi Cameroon nung nisung 25 shi poksetdaktsü

Douala, January 25 (Agencies): Peisasa pokseta asütsü mulungteter kiralongrar nisung 4-i Cameroon anüdoklentip tsütsütülen tentetba jila ka nung pokshiba lendong tesashi ka tanü Hombar nü atalokdaktsüba osang ka ketdangsertemi metetdaktsüogo.

Tanü amaker anati Bodo nung tentetba tongti shishilembadak pei temang nung alenokba bomb pokdakja lendong atalokdaktsü aser tanüngba amaker anati Bodo jila tiyongtsülen nüburtem kanga lungsoa alidak pokshiba lendong atalokdaktsü ta parnoki ashi.

Tan lendong atalokdak ya Nigeria linük nung tesep tentetba Islamist kiralongrar telok, Boko Haram-i mapang shia lendong atalokdaktsüba region nung densema lir.

“Bodo jila nung lendong tesashi 4 tashi tanep atalokba osang jangjaogo. Tan lendong nung ishiba agi nisung 25 poksetba aser nisung aika yiruba osang tang tashi nung jangjaogo,” ta parnoki shisem.

Ajisüaka, tanü lendong atalokdaktsüba atema telok shingia tang tashi nung tenüng agia metetdakja mali.

Nigeria northeast tsütsülen state balaka tenteta Islamic ozüng benoktsü meranger, Boko Haram teloki küm 6 tejaklen nungi tenzüka, Nigeria sorkar den raraba den külemi, kidangsüa tentetba linüktem nunga tan amala lendong mapang shia atalokdaktsür.

Boko Haram telok meshimeshia samatsütsü nükjidong nung anameta aliba linüktemi tentetba teloktep mitkar telok nung Cameroon mitkar züngsemtema densema lir.

Boko Haram teloki yaküm 2015 küm nungi tenzüka Nigeria den külemi, Cameroon, Chad aser Niger nunger nung taoba mapang nungi lendong tesashiba atalokdakja iba region nung tensa kanga mejungi kümdaktsüogo.

Yaküm, 2015 küm December nunga peisasa pokseta asütsü mulungteter tetsür kiralongrar anati pei temang nung alenokba bomb Bodo jila tiyongtsülen pokdakja lendong atalokdaktsüba osang bushiteta lir.

Ano külen, peisasa pokseta asütsü mulungteter kiralongrar kati Cameroon anüdoklentip tsütsülensa, Kouyape jila nung tentetba mosque ka kilung nung pei temang nung alenokba bomb pokdakja tan January ita 13 nü lendong atalokdaktsüba osang bushiteta lir.

Iba lendong nung nisung 12 tashi poksetba aser nisung 1 yiruba osang jangjaogo.

Boko Haram telok anema raratsü asoshi Chad, Cameroon, Niger aser Nigeria nungeri par mitkartem yokba den külemi, US-ia iba teloktep mitkar telok nem tongpang osettsüset agüja yaritepba osang bushiteta lir.