Kiralongrartemi Gurdaspur amak; Kiralongrar 3 den nisung 7 asü

Dinanagar, July 27, 2015 : Tabelen, army ka raratsü asoshi renemer aliba angur. Tiyong nung, telungpuri Dinanagar jila nung Dhaba ka nung akahdang nisung ka kahsetba tasümang angur aser tachijilen Dinanagar jila anasa train lenmang nung bomb 5 dokja aliba noksa angur. Pakistan arrtsü anasa aliba jila nung telungpuri bus station nung injang akahba aser police barrak tem ia amakba den raratsü atema army commando temi police den loktepogo.

Dinanagar, July 27 (Agencies) : Punjab kübok Dinanagar, Gurdaspur district nung Pakistan nunger kiralongrar ta temulung melemi bilemertemi police station ka amak.
Iba tatalokba nung kiralongrar asem khasetba den nisung 7 asü aser 10 yiru. Iba tatalokba ajanga India o Pakistan tsüngda olemtep tenzükshitsü aliba nung tetsükdaktsü ajurutsü ama bilemer.
Russia nung linük ana nungi prime minister tem – Narendra Modi aser Nawaz Sharif na ajurutepa senden alidang Pakistan aser India nungi tongti security ketdangsertem ajurutepa kiralongraba indang onük lemsateptsü telemtetba agi, saka iba sülen hopta ishika dang lir tanü lendong atalokogo.
Tanü Punjab kübok Dinanagar jila nung ghonda 11 shi raraba sülen India nunger sepaitemi kiralongrar asemprongla khaset. Parnokji Pakistan nung amenoka aliba Lashkar-e-Taiba mesüra Jaish-e-Mohammed telok nungi asütsü akok ta temulung malemer.
Parnok ya Deobar aonung Pakistan nungi India lushii miima aitba asütsü ama bilemer, ta sorkar osang ajanga metetdaktsü.
Home minister, Rajnath Singh-i Pakistan dang telangzüba tajung agütsütsü ta amokmerena metetdaktsüogo. Pai Delhi nung defence minister Manohar Parrikar aser national security adviser Ajit Doval na den ajurutepa iba osang metetpelaogo.
“Onoki yimjung aginür saka linük akhüm mesenmetua amshiba magizüker ta asen kidanger dang ni ashir. Iba olen ni tesüiba mapang jembiogo aser tang-a kasaji ashir. Onoki kodang rara metenzüktsü saka onok anema inyakra, telangzüba agütsütsü” ta Rajnath Singh-i metetdaktsü.
Külen Pakistan-ibo iba mapa inyakertemji par nisung lir ta asüba osang kecha mangazük ta metetdaktsüogo.
“Tanü Gurdaspur, India nung kiralongraba mapa inyakba kukua aitsü. Iba lendong nung nung taimaket taküm aika laluogo. Nisungtem yiruyibongba osangtem angazüker. Onoki tasür kibongtem den asüku lemsateper” ta Islamabad nung foreign office-i sangdong ka ajanga metetdaktsü.
Tanep 5:30 ako meta Dinanagar nung kiralongrartem jagi mezüng bus gari ka toudak nung injang khaloktsü. Iba mapang bus nung mena alir nsiung 4 yiru, iba sülen parnoki health centre ka den ki ka amakba sülen police station telungi ai.
Tasürtem rongnung Superintendent of Police (detective), Baljit Singh den security personnel asem aser civilian asem liasü.