Kiralongrartemi IAF osettem meraksatsütet: Home Secy

New Delhi, January 03 (Agencies): Deobar nü Home Secretary, Rajiv Mehrishi-i, security sepaitemi mapang shitak nung raraba ajanga Pathankot anasa aliba IAF (Indian Air Force) base amaker kiralongrartemi IAF osettem meraksatsütet, ta ashi.
“Mapang shitak nung raraba ajanga kiralongrartem nükjidong matalok,” ta pai New Delhi nung osangbenertem dang ashi.
Paisa, Honibar anepdang kiralongrartemi mamakdangyongi security force temi arrsang osang sangoktsür liasü, ta ashi.
Kiralongrartemi amaktsüa akok ta tongtibang tesemtem aser sorkar office dang jilia osang metetdaktsür liasü aser tamalen taxi anishir ka tepseter kiralongrartem aputsü asoshi tebushitak liasü, pai ashi.
Paisa, Honibar nü ghonda aika raraba sülen kiralongrartemji azüoktetogo, ajisüaka parnokji kiralogrartem asü masü’ar mejangjar, ta ashi.
Ajisüaka Deobar anepdang ano kiralongrar ana lir ta bushitet aser sepaitemi parnok den raradar. Kiralongrar anajia azüoktettsü, ta paisa ashi.
Pai ashiba agi, kiralongrartem jagi IAF sepai trok tepset aser ti yirutsü.
“Intelligence osang anguba aser mapang shitak nung security forces tem, talisa IAF sapeitemi raraba ajanga airforce osettem meraksatsütet,” ta pai ashi.
“Anungji kiralongrartem indang tongtibangba nükjidong tamakok nguogo,” ta pai ashi.