Kiralongrartemi Pakistan nung Army camp amak, par asemprong kahsetogo

Srinagar, October 06 (Agencies): Tanü Pakistan nunger kiralongrar asemi arrtsülen district, Kupwara nung aliba army camp ka amaktsü meranga liasü, ajisüaka sepai o parnok tsüngda sashia kahtepdang par asemprong kahsetogo.
Tanep 5:00 ako meta kiralongrartem jagi Kupwara district kübok Langate nung aliba army camp nung injang kahloktsü, iba sülen army temia meyiper injang kahloktsü, ta army ketdangser kati ashi.
Osangbenertem den jembidang Commanding Officer Colonel, Rajiv Sharang-i, army camp nung aliba perimeter fencing nung army temi melung malemtsüsa nisung kar anguba sülen parnok tsüngda kahtep, ta ashi.
“Parnoki tama injang kahloktsü aser onoki meyiper kahloktsü, iba sülen parnok jena moutettsü asoshi quick reaction team kati tesemji longbang. Onoki iba tesem sangwatsü atema illumination injang amshi, aser kiralongrar asempongla ji kahset,” ta paisa ashi.
Tesülen kiralongrartem ket nungi AK prangpong asem, Under Barrel Grenade Launchers asem, magazines ishika, injang, walkie talkie radio sets pezü, GPS devices asem, mobile phones asem, chiyungtsü takong kar den mozü aser map ka den matrix sheet ka angu, ta paisa ashi.
“Kiralongrar asemprong ket nung aliba mozütem nung Pakistan nunger temaitsü liasü. Ibaji ajanga par asemprongla Pakistan nunger lir ta jangjar,” ta Sharang-i ashi.
Tasüngdangba ka langzüdang Col Sharang-i, “Parnok tali asütsüa akok, saka onoki par asem dang angu. Anungji perimeter fencing tashi arurtemji par asem dang ta onoki bilemer,” ta ashi.