Kiralongrartemi Russia tayimtsü kazüka yokba kuli mali: Egypt

Egypt anülulentip tsütsü Sinai Peninsula kübok Hassana nung taküm October ita 31 nü tsükokba Russia’er Metrojet tayimtsü shilem ka yangi angur. (File photo)

Cairo, December 14 (Agencies): Kiralongrartemi Egypt kübok Sinai Peninsula nung Russia’er tayimtsü anüng tom nungi kazüka yokba kuli kecha mongutetba osang ka Egypt sorkari metetdaktsüogo.
Russia’er tayimtsü ka Sinai Peninsula nung taküm 2015 küm October ita anüng tom nung pokshiba lendong ajurua ali nung tsükok.
Kasa lendong nung tayimtsüi anir aliba nisung 224 prongla asüba osang bushitetogo.
“Russia’er tayimtsü Sinai Peninsula nung tsükokba den sentakba bushisüngdang agiba sülen tanü tashi nung iba tayimtsüji kiralongrartemi anüng tom nungi kazüka yokba kuli kecha monguteti lir,” ta Egypt’er civil aviation ministry-i sangoktsü.
“Kiralongrartemi anüng tom nungi kazüka yokba mesüra ozüng alema inyakba kuli kecha bushiteta mali saka Russia tayimtsü tsükokba den sentakba bushisüngdang maneni agitsü renema lir,” ta ministry-isa ashi.
Tayimtsü nung pokshiba oset yutsür kasaji anüng tom nung pokdaktsüba ajanga Russia’er Airbus tayimtsü anüng tom nung poka Sinai Peninsula nung tsükok ta Russia den külemi, United States densema, West linüktemi temulung melemi bilemba olen ka metetdakja lir.
Ano külen, Russia’er tayimtsüji par teloki anüng tom nungi kazüka yok ta shia, Islamic State (IS) kiralongrar teloki tayimtsü tsükokdakja lendong atalokdaktsüba atema tenüng agia metetdaktsüogo.
Russia-i Syria nung IS telok anema raraba kepzüka par teloki tayimtsüji kazüka yok ta IS teloki metetdaktsü.
Egypt kübok Sharm al-Sheikh tesem toktsür anüngleni yimketa atudang Russia’er Metrojet tayimtsüji anüng nung poka ali nung tsükok.
Iba lendongji kiralongrartemi atalokdaktsü ta bilema, Russia aser Britain napronglai par tayimtsütem Egypt-i meyoki nokdanga ayuba ajanga Egypt’er raliwalitsüren nem takoksa tulu bener arutsü.
Ano külen, Russia’er mitkar tayimtsütemi IS telok anema masü saka Syria Tir, Bashar al-Assad-i aniba Syria sorkar anemer anema ang rarar ta shia, West-i Russia aija lir.