Kiralongrartemi Social media ajanga Muslim amanger lanurtem mesür

Delhi, May 10 (Agencies) : Muslim amanger lanurtem jihad atema rarar akümtsü ajungmesoba ya linük aser international nung kiralongrartem inyakyim kar ajanga lir, ta intelligence agency temi asadangtetba osang kar ajanga metetdaktsü.
Mail Today osangkaket ajanga ashiba agi, social media nung Muslim telok anema raraba osang kanga sashia prokba ajanga item lanurtem jihad atema raratsü kanga ajungmesor.
Intelligence ketdangser tain kati, US Tir menden atema tokteptsü alisang Donald Trump-i Muslim amangertem anema o kanga mejungi jembiba den India nung tatalokba kar ajanga tarutsü nung tera timtemtsü, ta ashi.
“Social media ajanga shinga danga kecha mimshitsü matoker aser ajaki ajak meteter. Tatalokba ajak nung lokti balalai pei telok pu asemer aser pei lokti ajungtsü atema nisungi bilema maliba mapa tulusa inyaker,” ta Intelligence Bureau (IB) ketdangser rongnung lenir kati ashi.
Parnoki iba asadangba ya telok balala tsüngda mangatettep adokba angateta ozüng alema inyakertem mebilemdangi pua marutsü mechi nung sorkari tuyuba mapa lir.
Osang ajanga ashiba agi, intelligence agency temi Dadri (Muslim amanger ka nashi shi achiba atema Hindu amanger teloki tepsetba) inyakyim ya kiralongrartemi amshia lanurtem atsütsü meranger.
Ano ‘Hindu right-wing’ lenirtemi Muslim amangertem anema jembiba otema item kiralongraratemi proka nübu ayimer.
“Hindu amangertemi jembiba aser inyakba karbo kanga junga bilemdangtsüla lir,” ta ketdangser jagisa ashi.
Kiralongrar inyakyim kanga kara melenshir aser tangbo tesüiba mapa ama mapa tajung nung alirtem parnok memesür.
“Parnoki social media ajanga lanurtem den sensak asemer aser iba mapang parnoki nisung ka tebilemba lazüktsü meranger,” ta Kasa ketdangseri ashi.