Kiralongrartemi Sunjuwan Army camp amak; JCO ka asü

Jammu/New Delhi, Tsüklai 10 (Agencies): Küptoknü (Honibar) anepongi kiralongrartemi Jammu nung aliba Sunjuwan Army camp amakdang Junior Commissioned Officer (JCO) ka asü aser sepaitemia meyiper raradang kiralongrar ka khaset.
Jaish-e-Mohammed kiralongrar pongui army camp ji amakdang JCO, M Ashraf Mir khaset, aser sepai ka aser civilian ka densema nisung trok yiru.
Yirua alir rongnung colonel-rank officer ka densema lir, ta state parliamentary affairs Minister, Abdul Rehman Veeri-i metetdaktsü.
Ano tetsür asem densema tanur kar yiru, ta Army sangdong ka nung metetdaktsü.
Kiralongrartemji camp tesülen nungi aitba sülen JCO family quarters telungi ia injang khaloktsü tenzük.
Kiralongrartemji jenshiogo aser ki kar nung atsüka alitsü südi ta bilemer.
“Quarters nung tetsür tanurtem aliba ajanga operations kanga kümdanga odar,” ta Army temisa metetdaktsü.
Army special forces aser Special Operations Group-i kiralongrartem den khatepdang kiralongrar ka khaset aser pa ket nungi AK-47 rifle ka angu.
Army camp nungi metre 500 telungtet nung school tem shibangtsü atema district administration-i tuyuogo.
Union Home Minister, Rajnath Singh-i J&K DGP den iba tatalokba osang olaogo aser MHA ketdangsertem dang tensa ketdangsüa reprangtsü tuyuogo.
2013 küm Tsüklai (February) 9 nü Afzal Guru alenseta südaktsüba nung ajemdaker tawa Intelligence osang ajanga JeM kiralongrartemi army camp mesüra security establishments amaktsüa akok, ta tekümdangtsü osang metetdaktsür liasü.