Kiren Rijiju-i mebilemdangi jembi: GPRN

Dimapur, Rongchii (April) 9 (TYO): MOS, Ministry of Home Affairs, Kiren Rijiju-i jembiba osang ka Rongchii (April) 8, 2018 nü local aser national media nung prokshiba nung pai jembitsü atema temeten maliba onük kar jembisemogo, ta Ministry of Information and Publicity-i sangdong ka nung metetdaktsü.
Indo-Naga olemtep ya Prime Ministerial jenjang nung jembir saka Rijiju-i iba jenjang tila kümja jembibaji tim masü. Telok anaprongi kodanga yimten onüktem magien aser NSCN-i Naga nunger sasa yimsü asütsü takhangba agienogo ta Rijiju-i ashibaji pai bilemba dang lir. Iba olemtep ya jenjang tematiba nung jembiba mapang ka nung pai memetetba onüktem jembitsü nüngdak madoker, ta GPRN/NSCN-i ashi.
India Prime Minister Narendra Modi aser NSCN tsüngda Luroi (August) 3, 2015 nü Framework Agreement agiba ajanga tatembang telemtetba ka agitsü atema teinyaktsütem lateta yuogo. Iba ama tongtipang mapang ka nung kija mesüra telok kari tametdak maliba onüktem jembiba ajanga yimjung olemtep nung tetsükdaktsü ajurudaktsür. Anungji onoki Rijiju dang tarutsü nungbo tang ama o mashi mejembitsü ashir, ta parnokisa metetdaktsü.