Kiren Rijiju-i state nung telemsa adokdaktsütsü meranger: APCSU

Itanagar (Arunachal Pradesh), October 20 (Agencies): Tanü Committee for Citizenship Rights of the Chakmas & Hajongs of Arunachal Pradesh (CCRCHAP) aser Arunachal Pradesh Chakma Students Union (APCSU)-i, Bodhbarnü Arunachal Pradesh state assembly nung state sorkari Chakmas aser Hajongs nem senso magütsütsü atema bangzüng ka renemba atema aitsüogo.
Iba bangzüng ajanga state nung tribal nisungtem temeten kümzüka ayutsü ta yazü kuli agütsür, ta shia CCRCHAP Tir, Subimal Bikash Chakma-i, iba bangzüng ya Supreme Court tetuyuba aser obendang magizüktsü atema lir, tesünep raksatsütsü aser lokti tsüngda telemsa adokdaktsütsü atema lir, ta ashi.
CCRCHAP-i, 2011 küm census nung Chakmas aser Hajongs nütsüng ji 47,471 liasü, aser parnok ajanga Arunachal Pradesh nung nütsüng million 1.4-i amokmeren tensa majurutsü, ta ashi.
Chakmas aser Hajongs ya tribals, Tibeto-Mongloid aser Buddhists nungi lir aser parnok ya Bengal Eastern Frontier Regulation (BERF) of 1873 kübok Chittagong Hill Tracts nungi aru.
Arunachal Pradesh nung kar ajanga amokmeren ajurutsüsa lira, itemji tribals masüba nisungtem lir, aser 1961 küm bendanger 36,614 aliba nungi 2011 küm nungbo parnok nütsüng 3,84,435 tashi kümogo, aser ibaji shilem 1000% shi arenba lir.
Bodhbarnü Arunachal Pradesh Assembly nung, Chakmas aaser Hajongs nem senso agütsüra state nung tribal nisungtem temeten samatsü, anungji ibaji kümzüka ayutsü atema mera agia inyaktsü atema Centre matsüngdang benoktsü renema liasü.
Chakmas aser Hajongs ya North East Frontier Agency (NEFA, tang Arunachal Pradesh) nung jenok, aser iba ya 1964-1969 küm “Definite Plan of Rehabilitation” nung ajemdaker Indian Union kübok liasü.
October 15, 2017 nü Minister of State for Home, Kiren Rijiju-i facebook post ka ajanga, “Chakmas aser Hajongs nunger Arunachal sensotem mekümdaktsütsü atema Union sorkari telemtetba agia mali,” ta metetdaktsüba nung ajemdaker tanü APCSU Tir, Tejang Chakma-i, “India senso ka dang lir; Arunachal Pradesh senso, Punjab senso mesüra Tamil senso, ta telemsa kecha mali,” ta ashi.
Minister of State for Home, Kiren Rijiju-i Arunachal Pradesh nung telemsa adokdaktsütsü merangba ya kanga tia maka, ta paisa ashi.
Pa ya Arunachal Pradesh mesüra state nung tribal nisungtem atema dang masü, saka linük rangben atema Minister ka lir, ta paisa shisem.
2015 küm Supreme Court tetuyuba ka agütsüba anung ajemdaker taoba ita Centre sorkari 1960s mapang nungi tenzüka Chittagong Hill Tracts (Bangladesh) nungi Arunachal nung arua alir Chakmas aser Hajongs nem senso agütsütsü atema lemteta liasü.