Kirk Hammett Cellphone samar bushiba anenogo

August 15, 2015: Metallica kentener telok nung lead guitar atemsang, Kirk Hammett-i guitar atemtsü tasa aika enoka aliba, pa meyong tesamaba phone ji joko mangutsü südi ta bilemer. Iba phone ya 2014 küm samaba lir aser pai ashiba agi iba phone nung aliba item guitar track temji kodanga mangashitsüba liasü südi.
Pai iba phone ji mapang talangka bushiogo, ajisüaka tembar jenti-i yaria bushiaka phone ji mangur anungji pai joko iba phone ji angutsü teimla samaogo.
Tawa ‘The Jasta Show podcast’ nung arua adenba mapang pai, “Iba phone nungji guitar atemtsü tasa 250 tashi enoka liasü aser ibaji samaba ajanga ni kanga akoksaogo. Item tasaji ni kecha nunga talila agizüka mayu anungji phone samar anogo ana-asem nü kabo ni balaka aküm,” ta ashi.
“Ni phone ji tesem ka nung amendaka yur alitsü….tanaben angutsü akok. Ni meyiba angutsü imlar. Ni guitar atemtsü tasa 250 rongnungi 8 ang bilemteter aser tanüngbajibo mebilemteter. Anungji ni joko iba phone nung aliba kentemji kodanga mangashitsü liasü südi ta ser toktsür,” ta paisa ashi.
Podcast sentong nung adenba sülen pai yangji ajuruba tembartem ajak bushisüngdanger ka ka amai kümogo, kechiba süra parnoki Hammett dang email ajanga nü ket nung phone ji kodang tesüsa liasü, ta asüngdangyatsü tenzük.
Pa dang medemer kati, “Asenok Istanbul nung külemi kazüba mapangbo phone ji nü ket nung liasü amaiato,” ta ashiba pai bilemteter.
Ajisüaka Hammett-i, “Shibai metet item kenji alima nung alir shinga nema mangashidaktsütsü asoshi sama asütsü mesüra shiba metet ni tesüiba mapang junga maliba ajanga temerenshi ka angur asütsüa akok,” ta ashi.