Kiruphema nung anentsüh ajanga alu aika raksa

Dimapur, July 7 (TYO): Dimapur aser Kohima tsüngda NH.29 nung four lane yanglutsü atema ali ondokba mapang, Kiruphema nung anentsüh tulu alua lir.
Tzünglu aruba den külemi four laning construction company (Gayatri)-i ali mashi endokba ajanga iba timtem ajuru.
Tesüiba ita ishika Kiruphema yimtsüng nung anentsüh aiben aluogo aser iba ajanga alu aser gari lenmangtem raksatsüogo.
Tang anentsüh alua alibaji Kiruphema yimtsüng kübok Merü tesem nung lir aser nung tsüklu 16, süngdonglu aika aser reserved forest ka raksatsüogo, ta Dzüvi-u Zhünyü-i ashi.
Takoksa ajurubaji sen crore ka jungnüa asütsü, anungji district ketdangsertem, bangdakpur aser Firm/Contractor-i iba khuret atema tekaratiba nung mapa inyaktsü mepishir, ta takoksa angurtem tenüng nung Dzüvi-u Zhünyü-isa metetdaktsü.
Paisa ashiba agi, tzünglu aruba den, four lane yangluba Firm/Contractor-i yimtsüng ketdangsertem dang masüngdangtepi aser temelaba magii ali mashi nung endokba ajanga anentsühji alur.