Kisama nung Nagaland Police Welfare Centre stall lapoker

Kohima, Luchii/December 01 (TYO): Heritage Village, Kisama nung lapokba stall noklang aika rongnung nisung kar taküm nung temelenshi ka adokdaktsütsüsa stall ka lir, aser ibaji Nagaland Police Welfare Centre stall lir, ta osang ka ajanga metetdaktsü.
Nagaland Police-i achaayanga lapokba stall nungji teka agi yangluba osettsüset aika- molok nungi tenzüker tetsürtem sobutsü (jewellery) aser state kübok battalion balala nungi police temi yangluba collectible souvenirs angutsü.
Item osettsüset ayokba ajanga ajangzükba senji Nagaland Police Welfare fund atema asutsü, koba ajanga nüngdakba mapang Nagaland Police nungi kibongtem aser tanurtem yaritsü atema amshitsü.
Nagaland Police Welfare Fund ajanga senotsü teyari agutsüba ajanga kibong aika nung temelenshi kaogo.
Nagaland Police Welfare Centre ajanga Hornbill Festival amongba dang masü saka nüngdakbapur kar yaritsü atema aseni akokba tenlatsü asoshi maongka angur.
Nagaland Police Welfare Centre ya Heritage Village, Kisama nung World War II Museum anasa lir aser nai iba stall semdanga osettsüset kar aliba ajanga nüngdakbapur kar yaritettsü, ta kasa osang ajanga metetdaktsü.