Kisama nung World War- II bilemteta Peace Rally agiogo

Dec. 2, 2019 nü Kisama nung sempet agütsüba sentong nung tejaokertem aser NAMSA Officials-i takok angurtem aser WWII peace rally nung shilem agirtem tangokba noksa nung angur.

Kohima, December 02 (TYO): Kümshia Hornbill Festival dak sendakba nung Nagaland Adventure & Motor Sports Association (NAMSA)-i World War- II Peace Rally ayongzüka agir; aser iba ya Kohima nung WW II tongbang bilemtettsü atema agia aru; ajioda tanü iba rally WW-II Museum Complex, Kisama temabnga agiogo, ta ketdangsertem osang ka ajanga metetdaktsü.
Rally tembangba sentong nung tetushi tejaokerji DGP Nagaland, T.J Longkumer, IPS aser Major General P. C Nair, YSM IGAR (North) na liasü.
Ani iba senong nung alakteta jaokerji Principal, Woodstock International School, Mussoorie, Dr. Craig Allen Cook liasü.
O tatsüka jembidang DGP Nagaland, T.J. Longkumer, IPS-i, tanü putu nungbo tongbang, rara aser tepsetba menüngdaker; WW-II ajanga asen putiotsü nung maidoktetba tarak aket, aser tanü tashi asenoki iba tongbang ajanga civilians densema iba tongbang nung rarar sepaitem aser tai maket nüburtem asüba bailemteter, ta ashi.
Okila jembidang Advisor NAMSA aser Advisor to Chief Minister, Abu Metha-i, küm shia Hornbill festival den külemi World War-II bilemteta sentong ayongzüka amonger, aser iba nükjidong ya alima dang yimjung aser temeim osang proktsü atema lir, ta ametetdfktsü.
“Küm 75 tejaklen Kisama aser temeket tesemtem nung iba tongbang rara, aser iaba tongbang ajanga putiotsü melenshitsü,” ta paisa ashi.
Pai state adener tangalen nungi arur raliwalirtem dang alima den yimjung osang prokaba nung Naga nunger ambassadors akümtsü ayongzük.
Paisa raliwalirtem dang taruba kümtem nunga medemer, kibong züngsemem aser kinüngertem anisemer iba benjung nung adentsü mepishia metetdaktsü.
Parade Commander, Moa Longkumer-i WW II report metetdaktsü, Neingulie Nakhro leniba nung iba sentong agi aser NAMSA züngsem, Kuputo Shohe-i tepela anküp o jembia liasü.
Kasa sentong nung Most original vehicle, Best maintained vehicle, Most disciplined squad, Best weaponry squad, Best tourism promotion squad, Best ladies squad, Best uniformed squad aser Best family squad telemsa nung sempet agütsü.