Kisama nung Yimchungrü nunger Metumneo benjung among

Kohima, August 08 (TYO): Yimchungrü nunger tongtibang benjung rongnung ka,  Metümneo tanü Kisama, Kohima nung kanga mera keta mongogo.

Heritage Village, Kisama nung iba benjung ya Yimchungrü Union Kohima (YUK) leniba nung Yimchungrü Gazetted Officers Kohima-i ayongzüka among.

Iba benjung ya “feast of the spirits” ta ajar aser iba benjung ya kümshia menjang arühba sülen amonger.

‘Metumneo’ tetezü ‘tanela meshitetba lir” ta YUK Advisor, M Yinliu-i iba benjungmong teratet agütsü.

Iba sentong nung tetushi tejaoker, Land Resources Department Director, Hoto Yeptho-i, Naga nungeri kin kidong tsüngda meputepba tebilemtsü ajurur, aser iba ya ajanga kin balala tsüngda tesünep aser telongjem nung kongshir, ta metetdaktsü.

Iba dak sendakba nung pai, Naga nungeri kin tsüngda meputep toktsür temeim aser telongjem agi melentsüla, ta ayongzük.

“Asenoki asen kibong, kidong mesüra kin atema dang masü saka Naga nunger ajak atema nokdaktsüla aser tesempa indoker telongjem aser temeim agi melentsüla,” ta paisa ashi.

“O agi dang masü saka mapa agia asenok ya yimjung yanglurtem asütsüla,” ta paisa metetdaktsü.

Rongsenkettsüng agi asen nüngdak peritsü atema Naga nungeri meranga inyaktsüla, ta paisa shisem.

Pai kaketshirtem danga, degree angutsü atema dang masü saka shisatsü ngua taküm nung takok angutsü atema shisaliok bushitsüla, ta ayongzük.

Sentong nungsa Eastern Nagaland Peoples Union Kohima Tir, David Thingchum-ia jembi aser YUK Tir, T Kejingkhum-i lokti pelaa agizük.

Sentong nung Yimchung Berkshire Cultural Club Kohima-i sobaliba ken aten aser yar tsüngsang, aser lokti chiyungtepba sentong liasü.