Kiset shiruru metsüba nung temulung agütsütsüla : R Khing

Kohima, Rongchii (April) 13 (TYO): State rongsenkettsüng renloktsü atema kiset shiruru metsüba jenjang ajungkettsüla ta Animal Husbandry & Veterinary Services and Women Resource Development Advisor, MLA R. Khing-i ashi.
Animal Husbandry & Veterinary Services Department nung ketdangsertem den sensaksemdang R. Khing-i “kiset shirurutem metsüba maparen tajungba kümdaktsüba ajanga state rongsenkettsüng jenjang ajungkettsü aser ibaji ketdangsertemi nendaka inyaktsüla” ta ashi.
PDA sorkari temelenshi bener arutsü atema alizüng yur inyaker aser ibaji rongsenkettsüng aser loktiliba den külemi state nung terenlok bener arutsüba lir. Anungji, iba nung Animal Husbandry & Veterinary Services department-ia state indang rongsenkettsüng jenjang ajungkettsü atema mapa inyaktsü imlar, ta paisa ashi.
Küm shia Nagaland-i sen crore 200 dak tema alang tangalen nungi animal husbandry products bener arur. Iba ya tebilemtsü ka lir anungji iba khuret koktettsü atema Naga lanurtemi livestock & poultry farming mapa inyaktsü ayongzüker. Lanurtemi utem mapa inyakra mapa manguba khuret ajema akümtsü aser state indang rongsenkettsüng jenjang tajungba kümdaktsütsü, ta R Khing-isa ayongzük.
Paisa, Nagaland nung veterinary hospitals tashi itdaktsütsü aser demonstration farms tajungba kümdaktsütsü atema ashiba den dairy development nung temulung agütsütsü ta shisem.
Chief Minister Neiphiu Rio-i aniba PDA sorkari anogo 100 shia department ajak indang maparen reprangshimtsü ta telemtetba agiogo, anungji ketdangsertem aser staff-i mapa nung bendanga agüja inyaktsüla aser department tajungtiba rongnung ka südaktsütsüla ta paisa ayongzük.
Iba sentong nung mendenji Additional Director & HoD, Animal Husbandry & Veterinary Services, Dr. Aomangyang Walling liasü aser Principal Secretary, M.K. Mero-i Advisor pelaa agizükba den department ajungshia o jembi.