Kit-i ‘Game of Thrones’ nung kodanga shilem magitsü nangzük

Luchii/December 2, 2018 (Agencies): Actor Kit Harington-i ashiba agi TV series Game of Thrones tembangba ya temenungratsüka saka pa iba show atema episode talila yanglutsü asoshi meyipa maotsü.
British actor-i iba show nung 2011 küm nungi tenzüka Jon Snow shilem agiogo aser taküm küm tetenzüklen iba show tatembangbuba season tangokogo, koba 2019 nung sayutsü.
Pa taküm nung iba shilem tembangba ya temenungratsüka saka Harington pa career tejakleni bener aotsü asoshi jashia mebilemer aser show-i tanaben meyipa marutsü nangzükogo.
“Iba mapa toktsütsü asoshi tasak liasü,” ta Harington-i bbc.com dang ashi.
Paisa, “ajisüaka ni jashir tabo meshitettsü. Ni ama nenoka ‘Game of Thrones’ nung küm 10 dak tema indokra ibaji actor ka indang career atema mashi lir. Auh iba show toktsütsü asoshi tasak liasü saka ni tanaben meyipa maotsü,” ta ashi.
Iba series indang Spin-offs tang teyangludak lir aser Naomi Watts bo prequel series, The Long Night nung shilem agitsü jangjaogo, koba show nung tatalokba tem matalok tsüngda küm meyirejang aika jankdang atalokba otsü ashitsü.
Pai prequel nung shilem tilakabo agitsü bilemdangtsü asü ta asüngdangba mapang pai shilem magitsü ta langzü.
Arishi küm 31 tain actor ya tang True West nung Beast actor Johnny Flynn den külemi shilem agidar. Iba saya nung Harington-i Austin shilem agir.