Kiyanilie-i ‘Budget for Children (BFC)’ sayatsü

Dimapur, July 22 (TYO): July 22, 2016 nü Social Welfare & Parliamentary Affairs Minister, Kiyanilie Peseyie-i 2015-16 atema Nagaland nung Budget for Children (BFC) indang budget sayatsü.
Tanü Secretariat conference hall, Nagaland nung Minister Kiyanilie-i Budget for Children (BFC) handbook ka sayatsüdang, ‘state sorkari Nagaland nung tanurtem jenjang ajungkettsü meranger’ ta ashi.
Social Welfare Department aser iba dak sendaktepa aliba kongsangtem – Integrated Child Protection Society, State Resource Centre for Women amalatemi tanurtem atema mapa inyaker, ta pai ashi.
“Tanurtem temang nung timtem melii aser tetsükdaktsü majurudaktsüi indaktsütsü atema state sorkari health, nutrition aser education nung temulung agüja mapa inyaknür. Iba alizüng atongtsü atema senotsüji kanga dang tongtibang aser handbook adokba ajanga tanur aika teyari angutsü imlar,” ta Kiyanilie-isa shisem.
Sentong nung HAQ centre for Child Rights, New Delhi Programme officer, Farhana Yasmin-i o jembidang ashiba agi. Nagaland state yongsük nung arishi küm 18 ser teküpok alirtemi noklang nung shilem 41.46 lir.
“Northeast nung tanga state tem dang nungi Nagaland-i tanurtem asoshi budget lemzüktsüba nung mapa tajungba inyaker. Tanurtem asoshi lemzüktsüba senotsü dak sendakba mapa kanga junga shisadangtsüla, teindoktsü metettsüla aser senotsü mapa küma amshitsüla” ta laisa ashi.
Budget for children ya budget balaka masü saka tanurtem atema inyakba mapa melamela inyaksangshitsü atema budget sendong nungi agitetba dnag lir, ta laisa ashi.
Sentong nung mendenji State Resources Centre for Women Nagaland, Mission Director P. Daisy Mezhur liasü, Nagaland State Social Welfare Board Chairperson, BanoVinito-i tesentepertem pela agizük.
Sentong nung North Eastern Social Research Centre, Guwahati Director, Dr. Melvil Pereira-i Preliminary Observations indang onük jembi aser Nagaland State Commission for Protection of Child Rights Chairperson, Meilemla Pongener-ia o tatsüka jembi.