Kiyanilie-i ENWO Cultural Carnival lapoktsü

Dimapur, October 21 (TYO) : North East Zone Cultural Centre, Ministry of Culture, GOI-i Eastern Nagaland Women Organization (ENWO) den külemi ayongzükba Cultural Carnival tanü nungi NEZCC Complex Dimapur nung tenzükogo.
Mongulbarnep Social Welfare & Parliamentary Affairs Minister, Kiyanilie Peseyie-i Cultural Carnival lapoktsü.
Eastern Nagaland Women-i ayongzükba sobaliba sentong ajanga asen lokti nung tesentaktep aser sobaliba wazüka ayuba maparen tashi itshitsü, ta Kiyanilie-i ashi.
DAN sorkari Women Oriented Development Programmes nung temulung agüja inyaker aser item ya ajanga tetsürtem tajangzük jenti angur. Anungji sorkari terenlok asoshi inyakba mapa nung tetsürtemi shilem agitsüla, ta paisa ayongzük.
“Asen lima nung Telongjem, Yimjung aser Azükaru bener arutsü atema asenok külemi teka amtepdi, kechiyong yimjung melira terenlok malitsü” ta Kiyanilie-isa mepishia metetdaktsü.
Sentong nung Rural Development, REPA Minister, C.L. John-i o jembidang, ENWO-i iba sentong ayongzükba atema tenüngsang agütsü.
“Iba ya ajanga asenok tejakleni aoba sayur. Sobaliba/benjungbentsü melira kin aser linük mali” ta paisa ashi.
Sobalibaji yartsüngsangba aser sübosolemba dang masü saka mapa inyakba ajanga temelenshi bener aruba dena lir, ta C.L John-isa shisem.
Cultural Carnival lapokba sentong nung mendenji ENWO Vice President, Imoto Phom liasü aser ENWO, Mrs. Birila Tokiu-i tesentepertem pelaa agizük. Sentong nungsa Konyak Nyupuk Sekho khong aser Khiamniungan Menyiu Hoikan nungertem shilem agi.
Iba Carnival lapoktsüba sülen tongti tesemdanger Social Welfare & Parliamentary Affairs Minister, Kiyanilie Peseyie den tarurtemi stall tem sema senzü. Sentong nungsa Advisor DUDA Thongwang, party ketdangsertem aser NEZCC officials nungertem aden.