Kiyi-i ita achiba (lunar tetrad) Sept. 27 aser 28 nü angutsü

EEESeptember 26, 2015: (Agencies): Tanü nikongdang anü lulii kiyi-i ita achiba (supermoon) atalokba ajanga alima nung temelenshi tulu arutsü ta olulu jembiba agi ‘Mormon Church’-i, tamanger shingaia alima tatem anasa arur ta mebilemtsüla, ta sangdongogo.
Anü aser ita na yongtsüi alima aiba ajanga anü tesangwa agi ita metongteti nokdanga ayur. Ajisüaka iba mapang alima tezülen nungi tesangwa aika jashia aoba ajanga itaji kanga merema angur. Ibaji ajanga NASA-i kiyi-i ita achiba dang ‘Blood moon’ taa ajar. Iba ya küm nung anaben ataloker aser nübur ajaki kanga janga meteta lir.
Aji süaka mapang nung khen kiyi-i ita achiba ya atonga atonga pezüben (Four Blood Moons) ataloker aser iba dangji ‘lunar tetrad’ ta ajar.
Deobar aonung ‘Blood moon’ mapang tetsübutsü lendong aika ataloktsü ta kanga sashia jembiba ajanga temang kümzüktsü sobutsütem kanga alitepdar.
Mormon Church shirnok dang ‘The Church of Jesus Christ of Latter-day Saints’ ta ajar, iba nung kaket zülur, Julie Rowe-i, taonung kiyi-i ita achiba mapang ita nung temeren sakloka alibaji tanga mapang kiyi-i ita achiba dang tuluba asüba ajanga alima tatembang kati aruba temaitsü sayur, ta ashiba sülen nüburtem ajak kanga tsübua aküm.
Aji oda süaka, nisung kwii Ms Rowe-i ashiba amangerar meshitet, saka Mormon nung lennirtemi kanga süoki ia bilemba agi tamanger shingaia alima tatem anasa arur ta mebilemtsü sangdongogo.
Kasa sangdong ajanga parnoki, “Tamanger ajaki pei tamang akangshiba ajanga alima aser pei taküm nung temelenshi aruba ajak koktettsüsa alitsü merangtsüla,” ta ashi.
Parnokisa, nisung kati ashibaji ajanga memangmangtsüla, ta shisem.
Tan ita tetenzüklen Mormon lennirtemi arogo kaketreju nung ketdangsertem aser tesayurtem dang Ms Rowe-i züluba kakettem kanga ashishitsüla, ta metetdakja liasü.
Parnoki ashiba agi Yisu tanaben aruba ajanga dang jembia aruba otsü ajak tembangtsü.
Olulu sashira angashiba ajanga Utah, US nungbo kibong aika nung chiyungtsü talila alioka lir, ta osang kar ajanga ashi.

You must be logged in to post a comment Login