Kiyimer Mongpu Aruogo

~ Talitemjen Imchen.

Ano Khristan yimsü matongdang, kibong akümbaji Moatsü anempong/benjong sülen liasü ta otsü agi angazüker. Khristan yimsü tenzüker külen tsürabur mapang kiyimba benjongji aonung agi. Aji October aser November ita tashi kisen yanglur December ita nung benjongji ayongzük. Yim kar nungbo January aser February ita tashi kisen yanglur March ita nung benjongji agia kiyimeri kiyimla ji aniok. Mezüng ki sür kiyimla aniokba ki dangji KIYIMKI ta aja. Par mapang tenla ki nung kulizüng agir külen kiyimki jagi arua, pastori anir sali, tsümar moko, biri aser kar ki nungbo moko temesüng tashi kiyimeri renema akabatemji lemsatepa achi. Aser paonungji bangnem shi lemaa telok achi. Iba sülen wawamenütepa ken tentepa yimerji kiyimki nungji kazütep.
1980’s tashi nungbo tuluka melenshia, külizüng agütsüba anüngdangi melenshia aküm. Aser December mapangsa timbai kiyimba benjongji ayong. Benjong nung chitem temersa longsolongsoa chiyungtepba bilemteter. Iba mapang jang mesüra nashi aser ak lepseta benjongeri telok chiyung peridaktsü. Chitem atemeri nashi shi mesüra jang shi shimelang ana den ak shi shimelang ka inoka temer, külen anükapangertem süoshi tera teshisa den tejen agir, tejak nung ponak keter, ano karbo azüa tera mezüsemer pelaseta, tarur ajak nemji lema agütsür chiyungdaktsü. Tejaoker kar marutetra chitemji kidanger ajangasa bener yok.
Ano yakta dang benjongbentsü ayongdang card amshitsü longsua tenzük. Sadi asüdang cardji kiyimsangi agütsüra kiyimsang tenüng nungji julem (pen) agi taki (tick) sür agütsü. Kiyimla tenüng nung agütsüra yamaji kiyimla tenüng nungji taki sür liasü. Ken kenbo nisung ka nem tenüng balala nung taki sür card ji ana agütsü. Item nisungjibo kiyimla aser kiyimsang prongla atema tongtipang nisung liasü. Ano mapang ka tena pronglai agütsür ta metetdakjaa, tenüng anaprong nungji taki sür cardji agütsü. Yamaji reception aser chiyungdaka kibong ana nung yanglu. Joko benjongmungertemji kulizüng magizükdang ki ka nung chiyungtsü aser kulizüng agizüker külen anünga akaba ki nungji chiyungtsü ta anabensa chiyung. Karbo kangshiasa chiyungba angu. Saka aji yimya sübaba ka asünung kar dak alaka ajaki kanga junger ta bilema benshi.
Tawa tanü kiyimer mongpu ya talisa Nov., Dec aser Jan. nung amonger aser yimtsüng tashi nung lokti chiyung table dang amshiteper. Benjong ayongeri chiyungtsü tapu balala aika renemer. Saka benjongmungertemi pei pei chinübaji dang inoker chiyungba putu ka lir. Taji shiri benjong ayonger aser chiyungba table nung shirnok nokdakdaktsür, parnok dangji jilia lia aon tapu balalatemji rasaa shiadoktsüla. Benjongdak kar dak alaka, chiyungba mapang benjongmunger ajak tarensena noktaker tekaratiba nung pei medemsang/medemla nung lenmang karaa aitsünüa, ya kechi aon, kechi indang aonar na ta asüngdang nung, akhüm taket aiür asangur jagi ashini, memetetako ta langzür. Karibo memeteta ta meshinerji mangashi atemer tenükji dang rüloktsür. Bilemdangra aji kanga taaktsüka. Benjong chiyungertemia, telok table tsütsü tejak shir tangar den o jembiba anentsüla. Chikok kar nung sali metsü keta aliba taki benjong ka nung ni angu. Aser o jembidang memeteti metsü tilala adokba ji asenok aika kuli lir. Sali metsü ama ji telok chiyungtsü jagi asen metsüji idar ta ajaki metettsüla.
Ano akok nungbo benjong nungji telok chiyungerbo salemtepba yimya ya anentsüla. Mesüra salem masüba atema medemeri mejashitsüla. Mesüra benjong table nung spoon peria yutsütsüla. Mesüra benjong ayongeri table nung azüngkenshi item ya mamshi nung koda? Kenü ni teka nung azüngkenshi menemerji ta bilemer, benjong ka nung azüngkenshi meinoki asoba aontem den dang chiyung. Chiyunger külen medemer semerjika shi den salemtep. Ni kidangi arur kü teka nung azüngkenshi menembaji apitepdang nung, azüngkenshi den chiyungba dang nungi tali liasü. Kechi temenemtsü aseni memenemer iba dangji teshinem ajar asünung, ni atema teshinemji kanga sashir liasü. Yamaji tanü mapang benjong ka nung salemtepba ya medemertem tsüngda salemer, tulur kar mesüra yimtsüyimbu kar densemrabang akhümtsübua orr salemer aser tetsür tebur yongtsü nung salemtepdang, kiyimla aser kiyimsangi anir ajak teka aser süoshi tashi nung azüngkenshi ya menemadoker. Aser iba sülen kidangi shilangdang mesüra teloktesen kar nung adendang, tangaria menemer aser parnok atemabo teshinem akümer.
Tanü putu mashi jaka ka nung benjong ayong dang, temetetteper ajunga nem card agütsüba putu ka lir. Card agütsüba agi na benjongi jaokbaji peridaktsütsüla. Cardbo nguraogo saka ta temulung nung kibur kidangi tsüngdong arutsü yimlaa malitsüla. Card alemertemia kanga kümdanga alemtsüla. Benjong kiburibo pei teinyaktsü inyaker ta bilemer, saka nai cardji magütsürabang benjong kibur o benjong nung amungtsü purtem yongtsü nung temeim mekongdaktsür. Temeim mekongadokba ya, “Entsü Nung Teret Chitet” den kasa lir. Taneptsü kanga tasak. Kodangang aneptsüar mejangjar. Ibaji nai card metongtsüba ajanga lir ta bilemangma. Cardji nai magütsütetrabang indangindanga benjong kibur ket tongtsütsü tim mesüra tawa tanübo Mobile Phone lirji, phone ajanga kiburi card yokba tejangja shiadoktsüla. Tat. Kü medemsang yimtaki 2014 Dec. benjong balala amongi oadok, Jan ita arur par dust pin nung küna prongla meyong card asem tashi inoktsür anguba, kena atema taküm new year message iba ji liasü. Kiburtem jagibo koba tashika jashitsüar nibo mejangjar.
Ano tekümdangtsü kaji card alemeri, ne card arua lir saka lenmang talangji koda asütsü ta phone ajanga asüngdangdang, “Nai phone nung metetdaktsübaji aji card angu den kasadang. na kecha sen indoka, nübu indoka, mapang indoka aji atema dangbo taru” ta langzütsü. Saka benjong nü kibur dang nibo carda magütsüakodi ta shia orr adentsü. Ibaji na asükümnüba agi benjong kibur o card alemer yongtsü nung temeim mekongdaktsür. Saka iba osangji card alemsangi angashi nungbo joko na atema paji tsükchir ka kümadoker ta bilemadokang.
Nisung ka taküm nung benjongji aiben majurur. Anungji benjong sentakba asenoki angateta temaba jenjang nung ayutsü junger.