Kiyimertemi bank nungi sen 24,000 agizüktettsü

Muzaffarnagar, November 17 (Agencies): Bihar, Muzaffarnagar district nungbo kiyimba kibongtemi kiyimba benjung atema renemtsü asoshi bank accounts nungi sen 24,000 agizüktettsü, kechiyong district ketdangsertemi iba atemaji telemtetba agiogo.
“Pei account lapoka aliba bank manager tem den jembiba sülen item kibongtemi tarensen nung menokdakaka sen 24,000 tashi agizüktettsü,” ta tanü District Magistrate, D K Singh-i metetdaktsü.
Sen agi anüngba kiyimtsüpur kibong aikati yashi District Magistrate’s office kima adenshia kiyimba benjung atema renemtsü asoshi sen mali, ta longkak aitba sülen district ketdangsertemi iba telemtetba agiogo.
Yashi nikongdang longkak aitertem jagi wedding cards amer longkak aita liasü. Kiyimba benjung atema renemtsü asoshi parnoki bank accounts nungi sen magizüktetba ajanga timtem ajangshir, ta shia parnoki longkak ait.
Iba sülen parnoki District Magistrate nem tezüluba nung temepishiba ka agüja liasü.