Kiyimtsü Tebilemtsü

~  Talitemjen Imchen.

Asen lima kiyimer benjong nung ak tali saputepa amshitepba yimya ya tenzüker, ano küm semer ajungmajung kaang aor südi. Saka benjong nung ak shi agi laka arudar asü ta nibo bilemer. Joko benjong nung aikati non-veg. table bushir masü veg. table ang bushiteper. Ashiko küm 10 mesüra 20 tejakdangbo, benjong nung ak shi ya mamshii tanga chiyungtsüang amshia aotsü mapang arutsüa akok.
Ano akhi mapangbo benjong nung netsüng yongzük ya kangabo melongsotep. Saka tawa tanü netsüngi benjong sapua longsotepba putu ka lir. Tanü putu yimsoshiba (civilization) ji ibai lir ta nibo aiben bilemer. Iba longsotepba yimya yaa ashiko küm 10 mesüra 20 tejakdangbo melenshiadoktsü. Aser benjong ayongeria medemer adianu kar dang jatepa benjong tilala ayongba dak alaka, tululu ayongteptsü mapang jagi mesayutsü akok.
Ni lanuwa mapang, tsürabur ajaki tepang medema jembiba olen ka angazükbaji, “Kibong Aküm Dang Arogo Nung Sadi Kuli Tajung Ngua, Kibong Akümtsüba Ya Angashi.” Ashiko yimtsüng ajaklen iba olen jembiba putu liasü südi. Mesüra ni süoki ia angazüknüba mapang ka, iba olen jembibaji angazüker alitsü. Tanübo wedding card kidangi bener arudang, “Ayama Taküma Sadi ji Kwika Asütsübar” ta aikati nemnemba angashir. Ken bilembo Egypt lima nungi Israel nunger anir adokdang nemnemba o tanü asenok nemnemba ya kanga puteper. Ni lanuwa mapangji kiyimba kulizüng magii kibong akümerji aika liasü südi, Saka tanübo wedding cardi alakba yimya nungjibo kulizüng agia kibong akümtsü sapurji aika lir ta meteter. Aser iba kuli ajanga, ni lanuwa mapang tsürabur sayutsüngi tajung nung tejang atangba sayur. Ano tanü putu saditsü atema aikati khuret süa bilemba olen ka lir. Ashiko benjong ayongeri, “Khuji tululu atakbayong, taret jagi anener dang alitsü.” Maneni tanüa, “Arogo Nung Kulizüng Tajung Ngua Kibong Akümtsü Junger” ta olen küma jembitsü kanga junger.
Tawa tanü alima tesemtem memedemi renloka aoba putu ka lir. England nung Industrial Revolution 19th century tetenzüklen, nüburtemji town nung meliteti yimtsüng balala bushia senshi. Tanü Nagaland nung Educational Revolution mapang, yimtsüng nung alima tesatem doktsür arua town nung timtema alitsü merangtepba putu ka lir. Joko town nung netsüng yongsük jenti akümba den, kasa gari lenmang tila nung anogo shia gari tali dang züindagi. Gari lenmang nung traffic jamji asadangra, “Tat. 2010 küm Chumukedima nungi teroto mapang Dimapur tiyong atongtsü minute 40 agia liasü. Tanübo ghonta 3 tashi süiaka, ken kenbo metongteter.” Iba ama nüburtem den lipuküm (environment) memedemba ji meteta, arogo balalaia süoki ia shisalemsatepdaktsüner. Aser joko kibong akümdang kiyimba kulizüng agütsüba yimya ya, tekülem kidang dang masü saka kiyimer kima nunga agütsütsü mela nung kanga ajungtsü. Talisa Mokokchung, Kohima aser Dimapur nung sadi mapang nungzütepbaji tesüngmangtsüka lir. Shiti ta asünungbo sadirjibo jilia renemba sentong nung senzürji timtemji aremtettsüla ta bilemer. Saka iba nü emergency süa senzür jibo ayatai akümer.
Dimapur nung Mass Wedding ozüng küma amshitsü bilemtepba ya, tang tangbo kü mulungbo sünga mebilemer, kechiaser arogotemji reprangdang nung, kiyimer kulizüngji pei pei arogo nung dang agitsü ta lir. Aser iba ama telemtetba ka nung aliba mapang ka, Mass Wedding ji ozüng süa yanglur ata nung, nisungji onsara kümer tekülem kidangi masemtsüsa ken kenbo kiyimer den nüburtemji adenshitsüsa akümtsü. Ano meimchir ajaki tajung dang bilemer masüji, iba ama netsüng tulu adenshidakji, tamajunger kari lendong agütsüra, Aorbo ajonga samatsü ana nung dang lir.
Nagaland nung tzünglu tashi agi aludang, anentsü alua nisung tashi ponger aotsüsa motzü ayimer. Saka Jammu & Kashmir nungbo anü tashi agi apudang ang, anentsü alua nisung tashi ponger aotsüsa motzü ayimba amai, iba ocet ajanga shinga meyirutsü mepishir.