Kiyimtsüpurtemi sen lakh 2.5 tashi agizüktettsü: Sorkar

New Delhi, November 17 (Agencies): Tsünüsembongtsü yokba aser kiyimba mapang sen tasen melenba inyakyim agi tetsükdaktsü adokba reprangteta sorkari kiyimtsü pur nem sen lakh 2.5 aser aluyimertem nem sen 50,000 bank nungi agizükdaktsütsü temelaba agütsüogo, ajisüaka joko magitsü ta sangdonger aliba sen tang melenteta aliba tang nungi tesadang agi tajemba, sen 2,000, ang melentettsü ta metetdaktsüogo.
Economic Affairs Secretary Shaktikanta Das-i, kiyimba benjong atema renemteper kibongtemi bank nung PAN aser pei sasa kuli sayuba sülen sen lakh 2.5 tashi agizüktettsü, ta ashi.
Arun Jaitley-i, sen 500 aser 1,000 senpaktem sen 45,00 tashi melentepteta alibaji asüng, Hokolbarnü nungi tenzüka sen meyirjang anana (sen 2,000) ang melentettsü, aser ibajia December 30 tashi nung khen dang melentettsü. Sen 500, 1000 senpaktem tanaben meyipa amshitsü sentong mali, ta ashi.
Tang tasen adokba senpaktem agizüktettsü atema ATM 22,500 tanü yanglushitsü, ta Jaitley-isa metetdaktsü.
Tanga osang ka nung Brihostibarnü Delhi lenmangtem nung longkak aitdang opposition party nungi Chief Minister ana- Mamata aser Kejriwal nati tang sen nokdangba inyakyim ya anogo asemnü tsüngda nung agientsüla, ta shia ibai nisung ka kijai tashi amshiba aser animesüngzüktetdaktsüba inyakyim lir, ta aitsü.
“Onoki asen linük kümzüktsü atema rarar, Ato Kilonser Narendra Modi-i pa kija tashi agi yimsü masütsüla,” ta WB chief minister Mamta Banerjee-i ashi.
Delhi CM, Arvind Kejriwal-i, Finance Minister Arun Jaitley’er jala tawa kiyimdang sen lakh 2.5 ang intok asü ? ta asüngdang.
“Modi-i Bank kima tarensena nokdakbaji linük meima taküm bendanga agütsüba mapa amai aibelena mebilemtsüla. Sen agizüktsü tarensena nokdangdang nisung 40 tashi asüba taiji shiba nem tongloktsütsü?” ta pai asüngdang, aser ibaji langzüa loktii “Modi, Modi” ta ayimten.
Emergency mapang nunga India nung tang ama animesüngzüktetba tensa majuru. Sorkari anogo shia telemtetba balala agir. Yakanü ang parnoki sen 4,500 melentettsü ta metetdaktsü, saka tanübo ano sen 2,000 ang melentettsü sangdonger, ta Banerjee-i ashi.
“Sen melendang temeyong nung maidoktetba shiai nüloktsütsü dena metetdaktsüogo. Ya kechi ataloker ? Onok ya kilir aser auer kar, saka nabo kanga ochishir asü ? Nüburtem ajak ya auer asü ?” ta laisa asüngdang.