Kiyir benjong tebilemtsü

Asen loktiliba nung tajung kaji Tsüngrem aser nisung tsüngdang kuli züngtepa kibong akümba sobaliba ya asütsü. Atangji, tasü agi mepila tashi apuani küma alitsü asoshi alir asünungji kibong akümtsüba mapa ya zübazüba bilema akümtsüba mapa ka masü. Ibaji dang masü saka tsüraburi pei jala aser jabaso tila asüdang nungi kanga meima anepalua tain kümdaktsür külen teti atema bendanga yoker asünungji, kibong akümba mapa ya temenungratsüka lir. Iba denji ano ajakibo timi kibong küma melitetter, anungji aiür aser asangurtem timi kibong küma alirtemji tatidang aika koktetertem lir. Ibayongji, asenok ajaki kibong akümba sentong ya benjongmong anogo tuluka kümdakja kiyir bejong sentong yanglur. Ano, asenokbo akok tashi ajak den putepa alitsü merangba sobaliba aser loktiliba nung alir asünungji, akok tashi kinunger aser medemertem dang masü saka yimtsür yimer aser kidang kiyongertem ajak kiyir benjongi jaoker. Ibayongji, kiyir benjongi jaokba shidi meyirijang dak tali menüngtsüsa akümer aser iba yariji kiojen, menden aser chiyongtsü renemtsüsa adoker.Item ajakji kodang asenoki sükdangdir kibong akümertem asoshi shisabolutsüka lir. Benjong asünungji shi aser ango na dang masü saka ano chiyongtsü tapu balala aika langpang sünga alitsüla. Iba denji sü ki yanglur ki naro enoktsüla aser kiyir benjong süoshi renemtsüla. Ano, tanü asüngbo tzü tajemtsü aser chiyongtsü auso aser marok tashi alitsüsa akümer. Iba amaji kodang kiyir benjong ayongzükdir sen lakh terbo melamelaa oadoktsü. Atangji, takaribo kiyir benjong nung sen crore junga endoker saka sensaker atemabo sen lakh ka endoka kibong akümtsübajia kanga tasak anungji aikati makoker. Aji oda, kibong aika asoshi kibong akümtsüba ya tebilemtsü tuluka akümer. Joko, tangar ama benjong tulu ayongzüka chiyongdaktsünü dang nisung aika sentsü nung kibong tenzüktsüsa akümer. Iba ama sobaliba tajung agi asenok asoshibo khuretang ka asütsüsa pei ashi dak alia kiyir benjong ayongzüka kibong kümtepba yimya nung ya temelenshi ka nüngdaker ta bilemer. Atangji, aiür ka aser asangur ka kibong akümnü taküm kecha telalu aser shinga nema chia techiyongdaktsü saka tenla kidang kuli kaket agizükra ojang ta ashitsübajia tim masü. Kibongji khen dang akümtsü, anungji ajaki meteta longsutepa aser pelatepa akümtsüla. Ajisüaka, kibong tasen metenzükdangyongi sentsü nung tenzüktsüsa sen apur kiyir benjong malitsüla. Asenok karibo kiyir benjongi arurtemi sempet bener arutsüba sen agi sentsü menoktsü tebilemba nung sen apua kiyir benjong ayongzüker aser sentsü nung kibong tasen tenzükdaktsür. Asenoki inyakba tamashi mapatem rongnung tamashitiba mapaji aji ka asütsü. Ano, benjongbentsü ayongzükba sentong aser inyakyim nung asenok melenshitsü nüngdakba kaji chir mechima soruchioker endoker. Asenoki nisung meyirijang dak tali ajaba rongnung to asenoki parnok kwi arutsüar meshitetter, kechiyong asenok sobaliba nung kibur dang jelia arutettsü mesüra marutettsü ta ashiba yimya mali. Anungji, tesüsa kiburi bilemdanger nisung noklang trok tenet ka atema soruchioktsü saka ibajia mechiyongma anüngtsü. Item ajakji alima nung züsentetba aser akaba rongsen amajok nung lalushiponger asürsü. Tanü lima yabo tzü dena kanga meyaka amshitsü ajungshitepba lima ka lir. Iba ama lima ka nung asenoki chiyongtsü mechima endokba agi alima tesensakba kümdaktsür aser yaa tzüra alir nisung aika anepalutettsü melen, amajok nung nisung aika chiyongshia  chiyongtsü endoker. Item tamashi aser amajok mapatemji reprangteta, joko kibong akümertemia tejaokba shidi ya pei kinunger adianu aser akang tembartem dak alaka meteta alir ajak nembo magütsüi telok tilaba küma kiyir benjong amongtsüla. Ano, tejaokba shidi angurtemia, kiyir benjongi arutettsü mesüra marutettsü ta jelia osang agütsüra, iba jagi nisung kwi asoshi benjong renemtsüar meteta adoktsü, anungji kangabo lalushipong masütsü. Asenoki kodang item temelenshi tajung ya bener arutetdir, ano lanurtem aika kibong timi küma jangratema alitsü.