Kiyonger Meputeper

Medemer aser kiyimerbo pei sasa shimtsü akok, ajisüaka kidang kiyongerbo aseni shimtsü makok. Anungji kidanger linük putepa alitsü melen alima nung kidanger linük aika tsükchitepa alir. India o Pakistan na ya teti kiyongersa asutsü. Linük anaprong ya alima nung rongsenkettsüng nung kanga renlokba linük lir aser mitkar tashia kanga renlokba linük ana lir, ibayongji alima linüktemi linük anaprong den temba ayimer. Yamaji linük anapronglai kati ka dak metaloka rongsenkettsüng tsütsü külemi azükarua aintsü atema tesendaktep yur inyakra koda jungla ta bilemer. Kibong kar nung adianuna tsükchitepa aruba medem India aser Pakistan na ya adianu linük amai lir, saka tanen makai meputepi tsükchitepa arur. 2014 küm Narendra Modi-i Pakistan linük den temba ayimtsü nükjidong nung mera agia pa Ato kilonser tenangzükba sentong nung adentsü atema taoba Pakistan Ato kilonser, Nawaz Sharif jaoka liasü, iba sülena Modi-i ajungbena Lahore semdangogo. Tesüiba küm ishika Pakistan-India arrtsülen Pakistan-i ceasefire ozüng alema inyakba osangtem anogoshia amai zünga arur aser Kashmir onük nung linük ana tsüngda taliba tsükchitepa arudar. Tesüiba kümtem Pakistan nung amenoka aliba kiralongrartemi Pathankot amak aser Uri nung army camp ka amakba ajanga linük ana tsüngda tesendaktep tamajungba kümer lia tawa Pakistan nung amenoka aliba Jaish-e-Mohammed kiralongrar teloki J&K kübok Pulwama nung CRPF sepaitem amak; ibaji mangyanga Indian Air Force-i Pakistan kübok Balakot nung JeM training amak aser Pakistan-ia J&K nung sepaitem kiojen amaktsü merang. Item tatalokba ajanga linük ana tesempatep tuluba kümogo. Mapangshia India o Pakistan linük na kati ka amokmerentepa arur aser linük ana tsüngda rara tulu adoktsüsa tensa aiben ajurur. Linük ana tsüngda 1965 küm aser 1971 küm rara tulu adoka liasü aser tang-a linük kati ka sashia amokmerentepa kati danga atsüanem mesüra linük ana tsüngda rara tulu adoktsü südi ta aikati bilemba mapang ka nung Pakistan Ato kilonser, Imran Khan-i, ‘yimjung temaitsü Pakistan-i India nunger pilot, Abhinandan chioktsü’ ta sangdong, iba dak alia tanü Pakistan Foreign Minister, Shah Mehmood Qureshi-ia alima tsüngdang Jaish-e-Mohammad tentetsang, Masood Azhar par linük nung lir, ta nangzükogo. Linük ana tsüngda ano rara tulu adoka linük anapronglai nuclear amshira nisung million aika asütsü. India aser Pakistan nati senteper nuclear warhead 100 shi amshia rara nungbo nisung million 21 shi asütsü, ozone layer tesadang ka shi raksatsü aser alima tsüngsang mopung melenshitsü, ta asadangtetogo. Linük ana sasep nung asadanger dangashi, nuclear amshibaji ajanga kidanger linüktema kongshitsü aser tsüngsang mopung nung temelenshi tulu adoka alima nung nisung billion 2 shii ayawara tia ajurutsü ta asadangteter. India tembar linük, US aser Pakistan tembar linük, China natia linük ana dang Kashmir mangatettep ken o yabo linük ana tsüngda yimjung nung ken o jembia bentettsüla ta mapang shia ajungshia arudar. Tashi tulu aliba linüktemi anir alima linüktemi joko alima nung rara tulu agi laktetogo, ibayongji ajaki alima yimjung atema inyaker, ajisüaka linük kati danga atsüanem mesüi tashi sayutepa nuclear amshira ibajibo kanga tamashi mapa ka asutsü aser linük tanaben asentenshia tangar meneptsü atema ano mapang talangka agitsü. Tanü Pakistan-i India nunger IAF pilot, Abhinandan chiokba ajanga India aser Pakistan na tensa süngjemtsü aser tangatetba tajung nung ken o jembiba ajanga mangatettep ken o ajak bentettsü imlar.