KL Chishi-i ajungbena party toktsür tai apuba atema sasar: NPCC

Dimapur, Aenjeti (January) 22 (TYO): KL Chishi ama Congress nung lenir tain kati Congress party toktsür ajungbena party dak tai apuba, iba den külemi pa dak alia tangar ajak nem tai tongloktsüba atema sasar, ta tanü NPCC Media Cell-i sangdong ka ajanga metetdaktsü.
“Pai aiben party toktsür oaka pa kanga tain akumba aser pai ajangshia arubatem ajanga party toktsüba yimya pai indoktsü ta amanga pa nem teti maongka agütsüba party ji Congress party lir, ta onoki pa dang nenshia metetdaktsür. Pai tang agi asembenbuba Congress party toktsüba ya otsüsütsüsa ka lir. Pa yimtenren party tasen nung adenba atema onoki junga bilemtsür,” ta NPCC sangdong nung shia lir.
“Ajisüaka pai tang BJP-RSS meima adenba ajanga pai Naga yimtenren onük densema Congress nem tai ajak tongloktsütsü menüngdak. Pa jakdanga nisung aikati Naga yimtenren onük tekaraba nung latettsü atema, ta jembia NPF-BJP nung denogo, ajisüaka ibaji parnok tai nembangtsü aser nübur dang nungi pei maksü nembangtsü atema tai kuli tatemtsü ka dang lir. Anungji onoki pa dang, pa mapang tatsüka Chief Minister inyakba menden akhümket wazüka ayutsü atema tanga lenirtem ama kasa tai metongloktsüi tanga onük kar ang bushiang ta mepishir,” ta kasa sangdong ajanga metetdaktsü.
“Congress Party-i tesüiba küm 15 tsüngda party timtemdaktsür lenirtem bushiba mapang ka lir. Item küm tsüngda party nung nendaka inyakertem aser lenir tajung akumtsüpur aika samaogo, aser ibaji tang party toktsür lenir taintem tai ajanga lir,” ta NPCC sangdong nung shia lir.
“Anungji state nung lenla ajaklen teraksa bener arutsüba regional aser communal forces- NPF-BJP, iba den külemi parnok nungi jakzükba NDPP tamakok ngudaktsütsü atema state nung secular tangatetba alirtem aser tebilemba tajung alir ajak dang Congress den longjemer parnok tamakok ngudaktsütsü ayongzüker,” ta NPCC-isa metetdaktsü.
“BJP-RSS indang telemsa adokdaktsüba onük aser parnok den tesendaktep aliba regional party tem ajanga parnoki telemsa adokdaktsütsü tebilemba aliba tenokdangerji Congress kija lir. Anungji onoki asen nüburtem dang kanga memonudang iba tensa tamajung angatettsü mepishir. Congress-i nübur ola angaa inyaker aser yamajisa inyaktsü,” ta parnokisa metetdaktsü.