Kma, Dmr, Mkg nung R’Day atema senden amen

Kohima/Dimapur/Mokokchung, January 12 (TYO): Republic Day amongtsü atema sentong yanglua mapa lemsatsü asoshi Jan. 12, DC Conference Hall, Kohima nung coordination senden ka mena liasü; iba senden nung Kohima DC, Rajesh Soudararajan, IAS mendenbuba liasü aser December 14, 2016 nü coordination senden nung 2017 Republic Day amongtsü atema renema aliba osangtem agi aser department balala, 9th Assam Rifles aser NGO telok balalai iba anogo nung Institution balala semdangtsü asoshi mapa lemsatepa liasü.
Mokokchung nungi osang ka ajanga, 2017 January ita asoshi tanü Mokokchung District Planning & Development Board senden mena liasü, ta metetdaktsü.
Mokokchung DC & Vice Chairman DPDB, Sushil Kumar Patel-i iba senden ania liasü aser senden nung Republic Day atema sentong yanglu aser sentong takok angutsü atema department balala nem mapa lemzükja liasü. Iba anogo nung Agri aser iba dak sentaka aliba department ajanga exhibition lapoktsü aser SHGs aser NGOs tejangrartem anitena shilem agidaktsütsü lemzüktsü.
Dimapur nungia ketdangsertem osang ka ajanga ashiba agi, R’ Day sentong dak sentakba senden ka Dimapur DC Kesonyu Yhome ajanga DC Conference hall nung January 11 nü ayongzüka mena liasü, aser iba senden nung Parade renemshitsü asoshi January 18 nungi tenzüktsü metetdaktsü.
Iba senden nung department balala nung tokolakpurtem dang iba anogo nikongsang retreat sentong ya linük ajunga nung agir asünung, sentong nung arua shilem agitsü metetdaktsü.
Senden nungsa, Civic Poll atema terenemshiba mapang ka asünung, department nung tokolakpurtem dang shilem tajung agia yariteptsü asoshi nenshia metetdaktsü.