Kma & Dmr police-i traffic tetuyuba agütsür

Dimapur, November 28 (TYO): India Tir Ram Nath Kovind-i November 30, 2017 nü Kohima-i arutsüba aser December 1, 2017 nü Naga Heritage Complex, Kisama semdangtsü aliba atema Kohima aser Dimapur police temi sangdong balala nung traffic tetuyuba kar agütsüogo.
3rd Assam Rifles Helipad nungi LCS Building, TCP Gate, Classic Island adena Raj Bhavan, Kohima aser NH-2 nung Raj Bhavan nungi Kisama tashi lenmang nung gari anentsü memelar, ta Sr. Superintendent of Police, Kohima, Vekhosa Chakhesang, NPS-i sangdong ka nung metetdaktsü.
December 1, 2017 nü Car Pass A, B & C alirtem dang Naga Heritage Complex, Kisama indang Gate No- I/ Main Gate telungi aitdaktsütsü. Car Pass X, Y & Z alirtemji December 2 nungi 10, 2017 atema dang asütsü, ta sangdong nungsa shia lir.
December 1, 2017 nü ketdangsertem aser public ajak anepdang 9:30 ako tashi nung Kisama atongtsü mepishir, kechiyong iba anogo Tir aser pa meinertem timi senzütsü atema traffic tenokdangba kar alitsü, ta Kohima Police-isa metetdaktsü.
Tir Kovind-i Kisama semdangba sülen parnok 3rd AR Helipad-i aotsü. Anungji, anüngdang 12:30 ako nungi traffic ajunga nokdangtsü, ta parnokisa shisem.
November 30, 2017 aonung 9:00 nungi India Tir meyipa mao tashi Kohima jila nung gari tulutem senzütsü memelatsü. Dimapur len nungi atuba gari tulutem Peducha Police Check Gate nung aser külen Khuzama Police Check Post nung sota ayutsü, ta Sr. Superintendent of Police-isa metetdaktsü.
Ano, külen Addl. Dy. Commissioner of Police/PRO, Dimapur-isa sangdong ka nung India Tir Ram Nath Kovind-i Nagaland semdangba dak sendakba nung traffic tetuyuba kar agütsüogo.
Tir-i semdangba mapang Airport Junction nungi Chapru (Bamboo Haat Piphema) tashi lenmang nung gari raksaba dena gari ka dang manentsü tetuyuba agütsür. Traffic timtem agütsüba gari ajak atsür aotsü, ta Dimapur Police sangdong nung shia lir.
Dimapur police-i November 29, 2017 nikongdang 3:00 ako nung Dimapur (Airport junction) nungi Chapru(Bamboo Haat) tashi Motorcade rehearsal alitsü. Anungji, public-i iba mapang timtem arema atatsü mepishir, ta Addl. Dy. Commissioner of Police/PRO-isa metetdaktsü.