Kma & Dmr tsüngda traffic tetuyuba agütsür

Dimapur, July 9 (TYO): Tzünglu kanga aruba ajanga Kiruphema (Mile Stone 163) nung National Highway 29 lenmang ajunga anentsüh agi anenzüka bener ogo, ta Sr. Superintendent of Police Kohima-i tanü sangdong ka nung metetdaktsü.
Iba timtem ajanga Zubza adena Kohima nungi Dimapur leni gari tilatem dang senzüdaktsütsü. Dimapur nungi Kohima-i atuba gari tilatem ajak Peducha-Tsiesema lenmang adsena senzütsü aser Zubza road ajanga Dimapur nungi Kohima leni aruba gari ka danga mesenzüdaktsütsü, ta Sr. Superintendent of Police sangdong nung shia lir.
Maneni, NH 29 nung anenzüka aoba tesem nung lenmang meyangluzük tashi Kohima aser Dimapur tsüngda gari tulutem senzütsü nokdanga atar, ta paisa metetdaktsüogo.
Ano külen, NHIDCL General Manger (Project), AK Gupta-ia iba onük atema tanga sangdong ka nung osang metetdaktsü.
Tzünglu kanga aruba ajanga Dimapur-Kohima lenmang kübok Peducha yimtsüng nung anentsüh alua lenmang raksatsüogo. Iba tesem nung Ministry of Road Transport and Highways kübok Ms Gayatri Projects Limited-i mapa inyaker, ta AK Gupta-i sangdong nung shia lir.
Anentsüh tulu aluba ajanga Kohima aser Dimapur tsüngda garitem mesenzütettsüsa kümogo. Iba khuret atema General Manager, NHIDCL den Kohima DC, Chief Engineer (NH), PWD aser contractor temi July 9, 2017 nü tesem tonga oa reprangdangogo aser July 10 nungi iba tesem nung mapa tenzüktsü, ta sangdong nungsa metetdaktsü.
Anentsüh alua aliba tesem nung lenmang yanglutsübaji anogo 15 shi ka agitsü akok aser iba atema state sorkar dang traffic telatetba kar agütsütsü mepishia asüngdangogo. Maneni public-ia iba anentsüh khuret angateta timtem arema atatsü mepishir, ta NHIDCL General Manger (Project)-isa ashi.