Kma nung election officers training agi

Kohima, December 21 (TYO): December 18, 2017 nungi December 20, 2017 tashi ATI, Kohima nung Nagaland state election officers atema India International Institute of Democracy & Election Management team motivation, experimental learning residential training ka agiogo; iba sentong nung tongti tesemdangerji CEO Nagaland, Abhijit Sinha IAS liasü, ta tanü ketdangsertem osang ka ajanga metetdaktsü.
Iba sentong nung jembidang CEO, Abhijit Sinha, IAS-i, “Iba training ya kanga tongtibang kechiyong asenoki tasen angazüker aser asenoki angazüka alibatem arangshir,” ta ashi.
Paisa, election ji arutsü aser aotsü ajisüaka taruba election atema nisung shia teinyaktsü shilem kaka lir, ta ashi.
Paisa, nisung balala den inyaksemtsüji tasak asütsü, ajisüaka officer shia item tayongzükba atema renema alitsüla, ta ashi.
“Officer kar temang manemi aliba ajanga imlaba ama meinyaktettsüa akok, anungji pei nem lemzüktsüba mapa inyaktettsü atema temang junga anepalutsüla,” ta pai ashi.
CEO-i, technology ainba ajanga nisung kati khen nung mapa aika inyaktettsü, anungji ajaki tangatetba tajung nung lenla ajaklen inyaktsüla, ta ashi.
Team lenirtemji Dr. M. Parivallal, Angels J.K., D.D. Mohanty, Bharvik Gouswamil aser Mupur Purohit Sumitra Gautam nunger liasü. Iba training nung district balala nungi parnok 262 training nung shilem agia aden.
India International Institute of Democracy & Election ya Bengaluru nung amenoka lir, aser parnoki linük tesem ajaklen ayimjema inyaker.