Kma nung GPPK aser Gorkha NGO-i Balidin Diwas among

Kohima, August 25 (TYO): August 25, 2017 nü Kohima nung Gorkha Public Panchayat Kohima (GPPK) aser Gorkha NGOs-i Balidan Diwas anogomong mongogo.
‘Balidan Diwas’ tetezü ‘Tenlaba Anogo’ lir aser iba ya August 25 nü India tesem ajungalen Gorkha nungeri Gorkha nüchiso atema rarasang, asür, Major Durga Malla-i taküm tenla agütsüba bilemteta amonger.
Tanep GPPK den Gorkha NGOs-i World War-II Cemetery nung taküm tenla agütsür Gorkha nunger nem naro agüja akhüm agütsü aser Major (asür) Durga Malla aser asür, Captain Neikezakuo Kenguruse na indang noksa yuja liasü.
Nikongdang GPPK Hall Chandmari nunga Joint Director of Treasuries & Accounts, Nagaland, R N Lama, tongti tesemdanger aser Reserve Officer, PHQ Nagaland Milan Sunam, tetushi tejaoker na dena sentong ka agia liasü.
O jembidang Lama-i lanurtem dang asür Durga Malla-i taküm tenla agütsüba ama asen lokti aser linük atema tenla agütsütsü melunga alitsü ayongzük. Iba sülen Milan Sunam-ia lokti den jembi.
GPPK Secretary, Jibon Pradhan-i, Subhash Chandra Bose leniba nung Indian National Army (INA) tentetba mapang nung Durga Malla-i British sepaitem toktsür INA nung dena liasü.
Asür Durga Malla ya 1944 küm March 24 nü Manipur kübok Ukhrul nung British nungeri apu aser 1944 küm August 25 nü alenseta südaktsü.
Pa indang kürakyanglu Parliament kima yanglua lir, aser ibaji 2004 küm Sept. 17 nü taoba Ato kilonser, Dr Manmohan Singh-i semzükja liasü.
GPPK Secretary-isa, Naga nunger sepai, asür Captain Kenguruse-i 1999 küm July 26 nü Kargil rara nung linük atema taküm bendanga agütsüba indang metetdaktsü.
Iba anogomong nüngtem nung azü tenlaba camp ka ayonga liasü aser iba camp nung Gorkha lanurtemi azü tenla agütsü.
Kasa camp nung Medical Officer I/c Blood Bank, Dr Tina-i azü tenlaba onük jembi.