Kma nung LRD-i state level Watershed Conference ayonga agi

August 28, 2017 nü Capital Convention Centre, Kohima nung state level Watershed Conference nung Roads & Bridges Minister, Dr. Neikiesalie Kire-i WDF lemtsüba noksa nung angur.

Kohima, August 28 (TYO): PMKSY-WDC, Batch II tembanga Department of Land Resources-i August 28, 2017 nü Capital Convention Centre, Kohima nung State level Watershed Conference ayongzüka agiogo; iba sentong nung tongti tesemdangerji Roads & Bridges Minister, Dr. Neikiesalie Kire liasü aser tetushi tejaokerji Land Resources & Excise Parliamentary Secretary, B.S. Nganlang liasü.
Official nüngdak kar nung mazüngba agi state Chief Minister, T. R. Zeliang iba sentong nung medentet, ajisüaka pa melen Dr. Neikiesalie Kire-i jembi.
Minister-i, state nung chiyungtsü peria madokdaktsüateter, iba den külemi state nung nütsüng shilem 70 dak tema aluyimbaren nung sendaka liaka tangalen nungi ang chiyungtsü bener arur, ta metetdaktsü.
Paisa, iba kuliji- kanga ajema züsentetba aser asenoki aluyimbaren nung scientific technology tem amshitsü arendakba ajanga lir, ta metetdaktsü.
Aluyimertem ajungshitsü aser sen aazükba maparen balala inyaktsü atema taoba, mapang Integrated Watershed Management Programme ta ajaba PMKSY state nung benokogo, ta minister-isa ashi.
Iba programme ajanga mapa mengui alir lanur aika nungita small scale entrepreneurship amenokogo aser sen aazükba tanga maparentem nung yarir, ta paisa metetdaktsü.
Paisa department dang yimtsüngtem nung aliba nüburtem taküm jenjang ajungkettsütsü atema mapa tajungji maneni inyaktsü ayongzük.
Parliamentary Secretary, B.S. Nganlang-ia, pai department nung mapang tatsüka inyaka arudang ketdangsertemi kanga nendaka inyakba reprangtetogo, ta ashi.
Paisa Department-i takok ngua schemes balala inyakba aser iba sentong takok anguba atema tenüngsang agütsü.
Kasa sentong nung Chief Secretary, Pankaj Kumar, IAS aser Watershed Committee Chairman, Yongam Village na densema aikati jembia liasü.
Iba sentong ya Secretary, Land Resources, Y. Kikheto Sema, IAS leniba nung agi aser Rev. Belho-i sarasadem. Sentong nungsa Zhadima village aser Tseminyu village nungi ken tajung aten aser Additional Director, Land Resources, Renben Lotha-i tepela anküp o jembia liasü.
PMKSY-WDC Batch-II takok ngua tembangba nüngtem nung Watershed Community-i inyaktetba indang ‘LRD communique- A special edition’ kaket ka dept-i sayaa liasü.