Kma nung Market-led Extension Sensitization programme agi

Kohima, Yimpoksüi/November 08 (TYO): Yimpoksüi/November 6, 2018 nü Nagaland state agriculture marketing Board (NSAMB) kübok Agriculture Produce Marketing Committee (APMC) Kohima den Directorate of Sericulture, Directorate of Fisheries & Aquatic Resources senteper Super Market area nung market-led extension sensitization programme den Sales Day reptepa agiogo, ta tanü ketdangsertem osang ka ajanga metetdaktsü.
Kohima district kübok yim 18 nungi aluyimertem iba sentong nung aden aser Seyie Auto-i takoker angurtem atema sempet sponsor asü.
Alu nungi züsentetba tetoktepba balala rongnung takokertemji- mapu- Zerüüno (Jotsoma), naro- Neibano (Jotsoma), somomo- Thejasenuo (Kezoma), Local Beans- Jamvii (Kijümetouma), alo- Kiesa Khroto (Kigwema), Carrot- Kinuseno (Khonoma), süngmok- Menei (Kijiimetouma), Squash- Kobuno (Kijümetouma), motram (Guava)- Zasenyiino (Khonoma), Local bengana- Avino (Nanprantsu), mochi- Seyievino (Kijümetouma), Vanaraja chicken- Asano Seyie (Khonoma) aser Silveroter chicken- Sekhoii Savino (Khonoma) nunger liasü.
Iba sentong nung tetushi tejaoker o jembidang Kohima Municipal Council (KMC) administrator, Kovi Meyase-i aluyimertem dang mozü mamshii aonsotsü aika tsünütettsü aser aonsotsü ayokertem dang lenmang nung aonsotsü mayoktsü saka market nung parnok nem lemzüktsüba tesem nung dang ayoktsü mepishia metetdaktsü.
“Market-led Extension” onük jembidang Assistant Chief Technical Officer (Agriculture Extension), Krishi Vigyan Kendra, Kohima, Longma Yanger-i, Market-led extension ya aluyimertemi aonsotsü aika züsentettsü aser market nung ayokba dak sendakba nung teyari tulu aketba hadir ka ama asütsü, ta metetdaktsü.
Market led extension system ajanga sustainable agriculture ajangzüktsü, ta shia pai, “Iba ya aluyimertem nem parnoki züsentetbatem ajanga senotsü aika ajangzüktettsü atema angatetdaktsüba ajanga ataloktsü,” ta ashi.
Paisa, ketdangsertemi market dak sendakba nung rangloker asalentong yanglua inyaktsüla, ibaji ajanga aika züsentetba dang masü saka market dak sendakba osangtsüsang agüja aluyimba tsütsü lenla ajak nung terenlok alitsü, ta ashi.
“India nunger aluyimba nung sen kanga indoker, nüngdakba information, talisa market dak sendakba osang memeteter, jila/yimtitemi oa litepba agi nübo agi anünger, infrastructure facility agi anünger aser storage facilities junga maliba ama kulitem ajanga marketing nung sen tali indoker aser sen junga majangzüker,” ta pai ashi.
Iba dak snedakba nung pai, Market Led Extension ajanga aonsotsü aika züsentettsü aser aser aluyimertemi ajangshiba tayongzükba aika koktettsü, ta ashi.
Iba sentong ya Kohima APMC züngsem, Kekhrievolie leniba nung agi aser Kohima APMC member secretary, Tia Jamir-i tepela anküp o jembia liasü.