Kma nung tebang-mechi chimar alirtem nem surgery agitsütsü

April 15, 2017 nü Oking Hospital, Kohima nung Dr. Palin aser Dr. Vikethonyu Kesiezie nati osangbenertem senden nung külemi jembidang tangokba noksa nung angur.  

Kohima, April 15 (TYO): Küm ka shi lir maneni Oking Hospital, Kohima nung April 29 aser 30 nü Nagaland nung tebang mechi chimar alirtem (Cleft) aser palate patient tem surgery angati agitsütsü.
Smile Train, India-i Mission Nagaland of Shija Group of Hospitals, Imphal kübok Oking Hospital Kohima ya tebang mechi chimar alirtem surgery agija taneptsü ngudaktsütsü atema Centre ka ama züngokogo, ta Smile Train Partner plastic surgeon of Shija Hospitals nungi Dr. Kh. Palin-i tanü Kohima nung aliba Hotel Japfu nung osangbenertem dang ashi.
Pa den Shijah Hospitals nungi mongintem aser Oking Hospital Kohima nungi nurse temi yaritepa surgery agitsütsü.
Nagaland nung tebang mechi chimar alir nisung 3,300 shibo alitsü, ta shia paisa, meta talang nungi aser yimtsüngtem nungi arur patients nem ainlen senzüdang intokba senotsü meyipa agütsütsü, ta metetdaktsü.
Mission Nagaland kübok aser Oking Hospital Kohima senteper yaritepa tang tashi nung Smile Train Cleft Shija Project-i Nagaland nung tebang mechi chimar alir nisung 600 shi surgery agitsüogo.
Paisa, angati mozü, angati surgery densema treatment ji angati asütsü, ta ashi.
Cleft week ya April 17 nungi 23 nü tashi amungtsü aser iba mapang nung cleft lip aser palate awareness agütsütsü.