Kma tesem aika nung polling kanga süngjema agiogo

Kohima, Tsüklai 27 (TYO): Nagaland nung tanga districts den külemi Kohima kübok 14 Southern Angami- 1 Assembly Constituency nunga Tsüklai 27, 2018 nü polling station 20 nung nisung meyirjang 13-i vote agutsüogo; iba menden atema tokteper candidates pezüji- Vikho-o Yhoshü (NDPP), Khrielezo Bio (NPF), Medokul Sophie (NPP) aser Nagakul Tase (INC) nunger liasü.
Tanep candidates- Vikho-o Yhoshü aser Khrielezo Bio na den parnok kinüngtsürtemi mezüng 7 Kigwema, MH Upper polling station nung vote agutsü. Medokul Sophie aser Nagakul Tase natia Jakhama Middle Panchayat Hall polling station nung vote agutsü.
Vote agutsür rongnung Kigwema yim nungi Person with Disability (PwDs), arishi küm 23, Vilhelie Kere-a densema liasü.
14th Southern Angami -1 nung GHS Jakhama town bo presiding officials aser security sepaitem ajakji tetsürtem dang liasü.
Polling station ajak nung Video surveillance inok aser polling stations nung menden, tzü, waiting shed, metsümeshidak agutsüba den aser PwDs atema wheel chairs anepalua yutsü.
Ano taoba mapang state Chief Minister aser NPF Tir, Dr. Shurhozielie Liezietsu-ia L- Khel Upper 1 Polling station nung vote agütsü. 10th Northern Angami 1 assembly constituency nunga tetsürtem kija atema temeja polling stations ana- 20 Baptist Higher secondary school aser 21 GMS Keyake liasü.
9 Kohima Town Assembly Constituency nung Dr, Neikiesalie Kire aser pa kibong züngsemtemi URA college of Teacher, D-Block Middle nung vote agutsü.
Iba polling station nung vote agutsür tambutisang ji arishi küm 99, Rhonthungo aser tantsütilaji arishi küm 80 Kehrino Haralu liasü.
Ano tanga polling station ka nung arishi küm 90 tema, Neikuonuo-i vote agüja liasü.
Ano tanga osang ka nung, tang mezüngsüa Wokha district kübok 38 Wokha Assembly Constituency nung polling station kabo differently abled polling officials-i dang ketdangsüa agi. Item polling personnels ji departments aser banking institutions balala nung inyakertem liasü.