KMC-i azü registration asütsü tenzükshir

Dimapur, May/Monupii 1 (TYO): Kohima Municipal Council (KMC), veterinary cell-i, KMC ward tem atema tanü nungi dog registration drive-cum- anti-rabies vaccination sentong tenzükogo.
KMC office secretary Zakiekhotuo Kiso-i ashiba agi, Municipal Act (Section 417) kübok, municipal arrla nung aliba azütem registration agitsü aser vaccine agütsütsü ya municipal khuret lir.
Iba Act dak sendakba nung KMC-i küm asem tejakdang azü 2000 dak tema register süogo. Ajisüaka tesasatsüka 2017 küm February ita 2 nü item kuli kakettem ajak rongtokogo, ta pai ashi.
Ibayongji KMC-i maneni registration agishitsüsa akümer, koba May 16 tashi agitsü. Tanü KMC-i North Block, Kitsubozou, Naga Bazaar aser D’Block ayimjema inyakogo.
Tanü nungi tenzüka registration drive-cum- anti-rabies vaccination sentong Kohima kübok ward 19 prongla nung agitsü.
Kiso-isa, KMC den KMC veterinary executive officer Dr. Ketholenuo Metha aser Veterinary Field Assistants (VFA) anati 2017, September ita 11 nü Chau Park nung dog pounding tenzükogo, koba kasa Act, section 58 (J) kübok urban local bodies khuret lir, ta ashi.
Kiso-i ashiba agi, KMC-i yimya agi azü nem ward ajak nung World Rabies Day amungba mapang Animal Husbandry & Veterinary Services department den longjemer vaccine angati agütsür
Kasa mapang nung Dr. Ketholenuo Metha-i shiba agi, iba sentong kübok May 2 nü Ward 17 & 18 atema Lower Agri Panchayat Hall nung inyakyim tem achaayanga agitsü.