KMSS-i state sorkar aitsür

Guwahati, May 30 (Agencies) : Assam nung aluyimer telok, Krishak Mukti Sangram Samiti (KMSS)-i Deobarnü BJP-i aniba state sorkar tasenbai parnok tashi amshi tenzükliyongi state nung nüngdakba longkaktem nokdanger ta aitsüogo.
KMSS-i, National Food Security Act inyakyim nung takok ngua meinyaktetba ajanga Hombarnü directorate of food & civil supplies mendanga longkak aittsü sentong aliba police-i nokdang, ta ashi.
“Sarbananda Sonowal-i aniba sorkari state nung ‘democratic protests’ nokdangner asü? Onoki assembly election agiba mapang nung BJP pum asemba ajanga parnoki iba mangyangji ayangerba asü ?” ta KMSS nung adviser Akhil Gogoi osangbenertem den senden akaba mapang ashi.
KMSS-i, ita shia state atema yokba jang quintal crore 2.21 kongi aoerar memeteter, ta ashi.
KMSS adviser Akhil Gogoi-i, BJP-i aniba sorkari state nung aliba check gate aika nung tax saruba anendaktsüaka anogo ishika tsüngda nung alu aser entsü amala chiyungtsütem nung sen tang timba kümogo, ta ashi.