KMSS puri wako tanak ayiplokja Amit Shah agizüktsü

Guwahati, Monupii (May) 17 (Agencies): Krishak Mukti Sangram Samiti (KMSS) puri wako tanak ayiplokja Amungnü BJP national presiden tir Amit Shah agizüktsü.
KMSS lenir, Akhil Gogoi-i Rasemnü ashiba agi, BJP-i aniba Centre sorkari Citizenship (Amendment) Bill, 2016 agizüktsü merangba anema parnoki Monupii (May) 20 nü ya ‘black day’ ama amungtsü. “BJP puri iba bill ya benoktsü meranger, koba onok asoshi challenge ka lir aser iba ajanga Assamese lokti liyonga aotsüba amokmerener,” ta pai ashi.
“Onoki state nung BJP-i aniba sorkar dang iba longkak aitba sentong akatsü atema temelaba agütsütsü jazüker (challenge). Iba longkak aitba sentong ya yimjung nung akatsü, ni nangzüker. Onok züngsemtemi LGBI Airport nung Amit Shah dang wako tanak sayutsü, kong pa senden ka nung adentsü asoshi renema lir. Züngsem shingaia pa anema yimyim ka danga mayimtsü,” ta paisa ashi.
Srimanta Sankaradeva Kalakshetra nung party senden ka nung adentsüba atema Shah anogo ka atema arutsü, ta BJP Assam committee osang ka ajanga metetdaktsü.
Iba bill ajanga Pakistan, Bangladesh aser Afghanistan nung Hindu, Sikh, Buddhist, Jain, Parsi aser Khristan tem shirok India-i 2014 Luchii (December) 31 masüdang aru ali, parnok nem lisopur jenjang agütsütsü asoshi meranger.
Gogoi-i ashiba agi, 2014 Lok Sabha election nung Ato Kilonser Narendra Modi-i ozüng alema aru alir tem Monupii (May) 16 tashi nungbo state toktsür aotsüsa akümtsü, ta ashi. “Küm pezü shidak süiogo, saka ozüng alema Assam nung arua alirtem shinga state toktsür mao. Kasa mapang nung tangbo BJP-i aniba sorkari Assam nung bendanger arua alirtem nem lisopur jenjang agütsütsü asoshi meranger. Onoki iba ya kodanga matalokdaktsütsü. Assam nunger tem ‘innocent’ lir saka matu masü,” ta Akhil-i ashi.
Paisa ashiba agi, Centre nung BJP-i aniba party temi sorkar kümtetba sülen pro-infiltrator initiatives agi. “Sorkari iba bill mebenok tsüngda Passport Act aser Foreigners Act nung tongtibang temelenshi bener aru aser iba ajanga Bangladesh nunger miypa yoktsü tamakoktsü aküm. Anungji tang onok Jammu and Kashmir ama special state status angutsü asoshi kanga saka kümogo.”
Akhil-isa 2015 aser 2016 nung Centre-i long-term visa bener alirtemnem (Bill nung shisema aliba lokti) bank account lapoktsüba, pei alitsü asoshi ki amala alitsüba, PAN card, Aadhar apply asütsüba atema employment facilities agütsü, ta ashiba den bendenloksema ashiba agi, iba ajanga ken o tebenjaba akümtsü.