Kobi melii Nagaland Congress MLA tem anema mapa inyaktsü : Narayanasamy

New Delhi, August 1 (Agencies) : Nagaland nung Congress MLA 8-i BJP densema aliba Democratic Alliance of Nagaland (DAN) nung adenba atema kobi melii New Delhi nung Congress lennirtemi mapa inyaktsü.
“Congress high command-i legal experts den asüngdangya südar aser kobi melii item MLA tem anema mapa inyaktsü” party general secretary aser Nagaland in charge, V Narayanasamy-i osangbenertem dang ashi.
Taküm May ita Congress MLA ti – SI Jamir, Tokheho Yepthomi, Apok Jamir, Hukavi Zhimomi, Imti Wabang, Imti Kumzuk Longkumer, Ishak Konyak aser Khekaho nungertemi Nagaland People`s Front (NPF)-i aniba DAN sorkar nung aden.
SI Jamir ya taoba Congress chief minister aser Odisha nung tang Angh teinyakdak, SC Jamir tenu lir aser Apok Jamir ji par jabaso lir.
DAN sorkar nung Tokheho Yepthomi nem Public health & engineering minister, SI Jamir nem Cabinet jenjang nung advisor to chief minister aser Imti Kumzuk Longkumer nem Assembly deputy speaker menden agütsüogo.
Ano, tanüngba MLA pungu nem parliamentary secretary menden agütsüogo.
Taküm February ita taoba Nagaland Pradesh Congress Committee (NPCC) tir S.I. Jamir aser taoba Congress Legislature Party (CLP) lennir Tokheho Yepthomi nati party tir Sonia Gandhi dang parnoki Chief Minister T.R. Zeliang’er sorkar nung dener ta tebilemba lemsatep.
“Iba mapang party tiri parnok dang BJP melira DAN sorkar nung adentsü atema timtem kecha mali ta ashi” ta Narayanasamy-i ashi.
Iba sülen Congress lennir ana jagi Zeliang dang Congress high command-i par sorkar nung BJP dang melira dendaktsütsü mulunga lir ta ashi.
Taküm April ita Congress party state unit nung ‘political affairs committee’ kati MLA tem sorkar nung adentsü atema telemtetba ka agi, saka party züngsemtemi ibaji anema noktak. Parnoki ashiba agi iba ama telemtetbaji political affairs committee masü saka executive committee ajanga dang lemtettsü akok.
“Iba telemtetbaji züngsem ajaki mulunga lemtetba masü aser iba onük nung party nung telemsa adok” ta Narayanasamy-isa metetdaktsü.
May 5 nü Sonia Gandhi-i NPCC Tir inyaktsü atema K Therie shim aser iba tasüngji pai MLA tem dang DAN sorkar nung madentsü tetuyuba agütsü.
Narayanasamy-isa ashiba agi, May 7 nü sangdong ka ajanga Congress tir-i MLA dang DAN sorkar nung madentsüla kechiyong asenoki BJP ama telemsa adokdaktsüba telok ka den külemi masütsü ta metetdaktsü.
Iba tasüngji MLA ti prongla sorkar nung züngsem asütsü aniok. Iba jagi ni party general secretary ka ama, parnok ajak party nungi anentsü aser show-cause notice ka agütsü, ta Narayanasamy-isa ashi.
(Maneni tapak 9 nung…)