Kobi melii Niti Aayog-i sensak tia atema luden ka tentettsü

New Delhi, January 13 (Agencies): Niti Aayog-i kobi melii sensak tia telatet ka latettsü atema mongintemi akümba luden ka tentettsü, ta ketdangser kati metetdaktsü.
“Sensak tia telatet ka asoshi mongin luden ka nüngdaker, kechiyong state aika liro memedemi lir. Ibaji latettsü atema onoki luden ka tentettsü,” ta ketdangser kati ashi.
2015 küm February 8 nü Ato kilonser, Narendra Modi mendenbuba ser Niti Aayog Governing Council mezüng senden amendang lemtetba nung ajemdaker iba kümjisa March 16 nü NITI Aayog vice-chairman, Arvind Panagariya, leniba nung Task Force on Elimination of Poverty tenteta liasü.
Task Force indang report ji 2016 küm July 11 nü Ato kilonser nem agütsüogo.
Tang sensak tia asadangbaji Suresh D Tendulkar leniba nung luden kati benokbatem nung ajemdaker asadanger.
Tendulkar committee-i ashiba agi, anogoshia yimti nung alirtemi sen 33.33 aser yimtsüng nung alirtemi sen 27.20 agi goods & services agirtemji sensaker masü.