Kobi melii Nitish Kumar indang Supreme Court ji Lalu asütsü: Naidu

New Delhi, September 24 (Agencies): Bihar Chief Minister Nitish Kumar-i, RSS ji BJP indang Supreme Court lir, ta aitsüba dak sentakba nung tanü BJP lenir aser Union Minister M Venkaiah Naidu-i, Modi’er sorkarji shingaia manishir, ta ashiba den külemi kobi melii Nitish indang Supreme Court ji Lalu Prasad asütsü, ta ashi.
“Kobi melii Lalu ji pa (Kumar) indang Supreme Court asütsü. Sorkar makümdang yongi pai (Lalu) par jabasotemji minister tem akümtsü ta sangdongogo. Cabinet akümtsü temetenji Chief minister dak lir,” ta Naidu-i ashi.
“India sorkar dak sentakba nung sorkarji BJP onük aser NDA onük ajanga aor ta jangja jangja metetdaktsüogo. Kechisa benokdir, ibaji tajung süra onoki agizüker. Shingaia onok dang metuyur mesüra manishir,” ta Naidu-i ashi.
Naidu-isa, “Parnoki (RSS) benokba dak sentakba nung nai junger-a ta süra agizüktsü. Majung-a ta süra nai magizüktsü,” ta ashi.
Paisa, October 15 nü sorkari taoba Tir Abdul Kalam asoba anogomung amungtsü, ta metetdaktsü.
“October 15 nü onoki Abdul Kalam asoba benjungmung mongner. Sorkari ibaji shisadangdagi. Onokisa Kalam’er jila Rameswaram nung pa nüngo ka yangluner. Iba atemaji Ato kilonseri committee tila ka tentetogo,” ta Union minister-isa shisem.