Kobi melii Rahul Gandhi Congress Tir akumtsü: Sonia

New Delhi, October 14 (Agencies): Hokolbar aonung Congress Party Tir, Sonia Gandhi-i, kobi melii Congress tatong Tir, Rahul Gandhi Tir akumtsü, ta metetdaktsü.
October 19, 2017 nü Diwali benjung sülen party nung tongti menden melentsü imlar.
Rahul Congress Tir shimba ajanga party nung temelenshi alitsü ta party nung inyakertemi bilemer. 2019 küm Lok Sabha elections nung ajemdaker iba telemtetba agiogo, ta osang angazüker.
Congress Party Tir mapang talangtiba inyakla, Sonia Gandhi-i, New Delhi nung taoba linük Tir, Pranab Mukherjee-i züluba kaket, ‘The Coalition Years’ sayatsüba sentong nung jembidang lai iba osang metetdakja liasü.
Kasa sentong nung Rahul Gandhi aser taoba Ato kilonser, Manmohan Singh nata densema liasü.
Rahul Gandhi Congress Tir akumtsü ya mapang talangka nungi jembia arur, aser tawa Congress lenirtema aika iba indang jembia liasü.
Mongolbarnü Congress lenir tain, Sachin Pilot-i party telung senden ka nung Congresss Tir atema Rahul shimtsü asoshi ajaki melunga agizükba osang metetdakja liasü.