Kodak yimli nung shiba tulutiba ?

~ L.Kika  Pongener, Aoyimkum,Dimapur.

Mathi-18:1-4. Iba mapang nungji nutsüngtem Yisu dangi arua asüngdang, Kodak yimli nung shiba tulutiba ?
Luke -9:46. Aser shiba tulutiba ta nutsüngtem rongnung toktepa jembitep.
Mathi-20:20. Zebedi chirtem tetsü-i Yisu tang ashi- item kü chir ana Yakob aser Yohan ne yimli nung ka ne tajichilen aser ka ne tabelen amentsü mela-ang.
Yisu Khrista nutsüngtem rongnunga shiba tulutiba ? Shiba tuluba asütsü ? Shiba tekolak asütsü ? Shiba tanishir asütsü ? ta mapang shia toktepa atishitepa liasü ta asenoki item agüja aliba laishiba tekongtem nung jagi küli tejangja angur. Yisui pa nütsüng parnok ter-ana rongnungi tanishir mesüra tekolak shilem tenüng jateta shinga meshimtet. Laishirtemi ashiba agi, parnok rongnung Yisui temeimba nutsüngji Yohan liasü,aser tensa mapang aika nung tenüngteta mapa nungloktsüba aser balaka amshiba rongnung Peter,Yakob,Yohan par asem mapang kar nung tenüng tetshia amshiba angutsü. Iba dak alaka parnok terana rongnung pa tekolak mesüra pa tanishir ta shimtetba asenoki osang tajung kakettem nungji mangur. Ajioda, mapang shia parnok shiba tuluba asütsü ta toktepba ibala shisatsüji parnok ajak mulongjang taroktiba nung inoka alinungji, kenü anogo parnok ajak longjemer Yisu dangi arua asüngdang – “Ajangla Kodak yimli nung shiba tulutiba ” ??? aser shibai metet parnok ajungai pei mulong nung pa-ang tulutiba ta ashitsü imlaseta liogo sudi. Peter-ia tensa mapang ajak nung pai kü tenüng tamasa ajar asünung pa-ang tuluba ta ashitsü imlaogo südi, Yohan-ia parnok rongnung Yisui pa temeimba,anungji pa-ang tulutiba ta ashitsü imlaogo südi. Yakob-ia Yisu tenemi tur sentsü melenba mapang nunga Peter o Yohan na den pa-ang anisem,Yirusalemi takok ngua aiba anogo nung Gado chanu anir arutsü yokba nungtua pa-a dena yok,anungji pa-ang tuluba ta ashitsü imlaogo sudi,ajioda parnok ajaki pei sasa pa-ang asütsü ama imlaseta liogo sudi. Ajisüaka Yisui parnoki khenyongi meimlaba tila tanur ka anir arua parnok rongnung toktsü aser ashi, shibai ibala tila tanur ama ajemalua kümdir pa-ang Kodak yimli nung tulutiba asütsü ta ashi. Ano tanga mapang ka nung Zebedi kinüngtsüi lar jabaso ana Yakob o Yohan Yisu Khrista yimli kodang arudir ka pa tajichilen aser ka tabelen amentsü asüngdang,ashiko tenati par külem medemertem lia iba o-ji Yisu tang asüngdangtsü numa-medangteti bilemba agi tetsü nem-ang shidaktsü asütsü. Saka Yisui kechi langzü ,ni koba marok jemdir iba marok-ji tenadi jemtetdi ma ? Yisui timtem reshikangshi tako marok ajemtsü alibaji tenadi jemtetdi ma ? ta asüngdangerba. Yisu nutsüngtemi Kodak yimli ya alima yimli den meyoktepa angatet, ajioda Yisu nutsüngtemi Yisu Khrista-i David chuba yimli tu tanaben meyipa bener arua mener Rom nunger nungi nujiso ngur parnokji par jamirtem asütsü aser Yihuda yimli ka merena yangerteter iba yimli madak parnok yimsusur asütsü ta alima yimli den meyoktepa angatet sudi ta asenoki parnoki imlaa jembiba nungjagi angateter.
Tanü asen putu nunga kin o kin tsüngda, kidong o kidong tsüngda tambu raktepa tiyazü otsü tasen tasen puratepa zülutepba ajanga raratep manener, court nung case agitepba manener, linuk ajunga nung sorkar yimsusuba mendenji reprangdangra külem tatar rongnunga kilonser menden raktepdang mangatettep aser telemsa adoker,party party tsüngda nung telemsa adoker, yimtsüng putu yimsusuba menden nunga kati ka küpok melitet meputep telemsa agi sunger, mungdang aser arogo nung sushia,loktiliba ajunga nung tulutiba, tekolak, tanishir menden raktepdang teraksa, telemsa, meputep, rarapangsen, tsükchitep adoka lokti ajunga shiranger. Kodang Yakob aser Yohan na tetsüi Yisu tang ne yimli kodang arudir ozü jabaso ana ya ka ne tachijilen aser ka tebelen amentsü melaangma ta asüngdang,iba o-ji angashir tanüngba tangar nutsüngtem kanga jashia ain adoker alitsü,aji agi Yisui ibaji ngur ashi asü masü-ar parnok tang Yisui yamai ashi – Bendanger yimsüsürtemi parnok madak kibur akümer aser parnok tulurtemi parnok madak tashi amshir ta nenoki metet. Ajisüaka nenok rongnungbo kodanga yamaji masütsü , saka shibai tulur kümner pa nenok lar asütsü aser shibai tazüng kümner pa nenok kübok asütsü , yamaji nisung chir-a tenzükdaktsütsü masü,saka tenzüktsü aser aika alang pei taküm agütsütsü aru. Yisui Bendanger yimsüsür ta atishia ashibaji Rom nunger yimsüsür aser tulurtem shirnoki parnok madak tashi amshia kibur akümer parnok agi atishia jembir südi. Ajioda, shirnok alima purtem moijing nem yimsüsüdaktsür parnok jagi tangar madak kibur küma tashi amshir,saka ibala tashiji khenpiga tang lirbo süitemtsü aser tesülenbo parnokji ajak lar akümtsü ta Yisui parnok tang ashirba ta asenoki laishiba nungjagi angateter. (Mathi-20:25-28) tashi züngra tejangja angutsü. Yisu Khristai pa mapang tonga arur ta meteta pa aputsü ghonda ishika dang lia pa nütsüngtem den kümtettsü benjong chiyunger külen pai parnok tang tatempang tepila o ashitsü tenzüka ashi- Ni tebu dangi aotsü mapang atonger,saka shisa tebulo ni nenok asoshi talidak renemtsütsü aser ano ni nenok dangi süneptsüba tanela ka yoktsü aser pai nenok yaritsü, ta tatempang o ashidang, ashiko, nütsüngtem ajunga mulongjang nung surabang Yisui ashiba ama Pai toktsür orr külen onok rongnung lenir shiba asütsü mesüra Yisui pa charge ya onük rongnung shiba nem agütsür aotsü (?) ta bilemba Yisui reprangtet asütsü. Anungji Yisui yakta su ka bena aru aser susa nung tzü shiok aser parnok ajak tetsüng shitoktsütsü tenzük. Ajioda, ni nenok tesayur sernung ni kechi koda nenok tetsüng shidoktsür yamaji nenok kati ka tenzüktepang ta Yisui pa nütsüngtem ashi.(Yohan-13:1-14) tashi züngra tejangja angutsü. Tanishir ,tekolak aser lenir ka asütsüba ya konang nungsang dangbo masü,iba nungji khuret tulu lir,maparen ajunga nung tekolak ka ama tsüngsak-mepong ajak tamasa pa dak ondaktsü,nungsen-nungmen ajak pa dak enloktsütsü,ken o temerang tesepra ajak pai alangdangtsü, nangzük-nangra, tenla-tenji ajunga nung pa tama asütsü,saru-saji ajak tangar tang tamasa agütsür alitsüla. Tanu putu nung nisung aikati ibalaji mangatet tanishir tekolak lenirbo suner nungsenbo marem,ken o tasak arudang metizükteter,tenla-tenji nung tangar menepa magütsüteter, nubotsükbo maremer,taa magii anogo ka danga angadi nübo metsüoktsüteter. Item nisung jagi kodanga tangar madak tekolak, tazüng aser lenir mekümtettsü,pa/lai pei sasa kümnüyonga tangari pa/la sülen manidaktsü.
Temeim amangbapurtem, asenoki asen yimden ,arogo aser lokti nung,asen kidong o kidong na tsüngda nung,asen kin o kin tsüngda nung shiba tulutiba, shiba tambu,shiba tekolak,shiba tanishisang ta toktepa alitsü melena shibai Yisu Khrista-i abenba kangki khuret abentsü ? Shibai Yisui sayuba ama ajak dang tenzüktsü ? Shibai tila tanur ama ajemalua kümteter (?) ta peisasa tila küma ajemalutsü angazükdi,ajioda süra, asenoki alima senmangji amangtettsü, putu ka nung tangar küpok timtema ala-ashia liaka shiri ajemalua tila kümer Yisui sayuba ama litetter , parnok jagi kenübo alimaji anitsü,Tsüngrem-er maongkaji agitsü.Anungji iba temoatsü senmangji agitettsüsa lidi ta iba Tsüngrem o ajanga tazüngertem den lemsater.Tsüngremi iba o agi ajak moajangma.